Riri iti daga, maitudtudo nakapapatayan mannalon

DEL PILAR, Ilocos Sur – Riri iti daga ti maitudtudo a ramut iti pannakapapatay ti maysa a mannalon sadiay Barangay Concepcion ditoy nga ili itay nabiit.

Maipalagip a naireport idi agsapa ti Enero 10 a nasarakan iti talonna nga awanen ti biagna ni Melchor Sagay-oc y Sonio, 56, naasawaan, mannalon, ken residente iti nadakamat a barangay.

Nagsagrap ni Sagay-oc iti gunshot wound iti makannawan a barukongna ken tagbat iti mugingna.

Iti naiwayat nga autopsia iti biktima, narekobre ti innem a pellets ken plastic wad iti barukong ti biktima.

Limtuad iti panagimbestiga dagiti polis a sakbay ti pannakapapatayna, adda riri iti daga ti biktima ken dua a kabsatna a babbai ket nupay napasamak ti konprontasion iti barangay level, saanda a nagsisinnurot.#