Riri iti pagbeddengan, narisut

SAN FERNANDO CITY – Narisut met laengen ti riri iti nagbeddengan ti Sudipen, La Union ken iti Tagudin, Ilocos Sur babaen ti panagpinnirma dagiti gobernador dagiti dua a probinsia iti memorandum of agreement idi Nobiembre 5 iti provincial capitol ditoy.

Imbagian ni Gov. Manuel C. Ortega ti La Union idinto nga imbagian ni Gov. Ryan Luis Singson ti Ilocos Sur iti panagpinnirma iti MOA para iti pannakaipasdek iti ‘borderline’ iti ili ti Sudipen, La Union ken ti Tagudin, Ilocos Sur.

Nagpirma pay iti MOA da Mayor Wendy Joy Buquing ti Sudipen ken ni Mayor Jose Bonuan, Jr. ti Tagudin, ken ni DENR Regional Executive director Paquito Moreno.

Naipasdek ti pagbeddengan ti dua nga ili iti Amburayan River babaen ti composite team nga indauluan dagiti pannakabagi ti Department of Environment and Natural Resources.

Babaen ti nasao a borderline, naipasdek no sadino a paset iti Amburayan River ti nagpatinggaan ti Sudipen, La Union ken ti pangrugian iti Tagudin, Ilocos Sur tapno permanenten nga agsina dagiti dua nga ili.

Nabayagen a riri ti pagbeddengan ti Sudipen ken Tagudin iti Amburayan River a kangrunaan a pamataudan iti pamastrekan dagiti dua nga ili babaen iti panag-quarry ken panagkalap.

Gapu iti saan a nalawag a pagbeddengan iti kallabes, naparnuay ti riri iti nagbaetan dagiti dua nga ili, nangruna iti panag-quarry ken panagkalap iti Amburayan River.

Kabayatanna, kinuna ni Singson a ti panagpinnirmada ken ni Ortega iti MOA ket win-win solution iti riri iti pagbeddengan ti dua nga ili.

Innayon ti gobernador a pagsayaatan iti ekonomia ti MOA ti dua a probinsia malaksid a malapdan pay ti atiddog a proseso iti korte iti pannakarisut ti boundary dispute.

Segun met ken ni Mayor Buquing, ti pannakaresolbar ti boundary dispute iti nagbaetan ti Sudipen ken Tagudin, napukawen ti problema no asino nga ili ti akinlas-ud mainaig iti panag-quarry ken panagkalap iti Amburayan River.

Kinuna pay ni Buquing a saan a maapektaran ti panagbutos dagiti agnaed iti lugar.#