Latest News: RITM, awanan otoridad a manglapped panangusar kadagiti test kits — Tawid News Magazine - Weekly Ilocos News 📰

RITM, awanan otoridad a manglapped panangusar kadagiti test kits

BAGUIO CITY — Inlawlawag ti Research Institute for Tropical Medicine (RITM) nga awan iti bilegna a mangitantan ti pannakaited wenno panangusar kadagiti Coronavirus disease (COVID-19) test kits a maidondonar kadagiti ospital ken lokal a gobierno.

Iti maysa a pablaak, kinuna ni Angelie Jane Blanco, mangidadaulo ti RITM communications and engagement office, a saan a pakabibiangan ti institusion dagiti ramit para iti nasao a test manipud kadagiti pribado nga indibidwal, grupo wenno korporasion.

Innayonna a numanpay rebengen ti RITM ti mangisayangkat ti ebalwasion kadagiti lokal ken internasional a COVID-19 test kits, segun iti kiddaw ti Food and Drug Administration (FDA), saanda a responsable iti panang-accredit, regulate wenno aprubar dagitoy.

Segun kekuana, awan ti otoridad ti RITM tapno lappedan ti panagaramid ken distribusion dagiti ramit pansalun-at ken ag-agas.

Inaramid ti RITM ti panangilawlawag kalpasan a nagwaras iti Facebook post a nilappedan ti institusion ti pannakaaramat ti 4,000 reverse transcription polymerase chain reaction (RT-PCR) test kits nga indonar ti SM foundation iti Baguio General Hospital and Medical Center (BGHMC).

Maipalagip nga idi Abril 22, nagidonar ti SM Foundation ti RT-PCR test kits ti Baguio City kas panangsuporta ti inisyatiba ti syudad a mangisayangkat ti targeted mass testing. Malaksid kadagiti test kits, nangipaay pay ti korporasion kadagiti dadduma a ramit kas iti hyperfilter tips, system racks, ken cryovials. Sakbay daytoy, nangipatulod ti SM iti BGHMC ti ICU-grade ventilator ken personal protective equipment.

Idi Mayo 11, impalgak ni Baguio City Mayor Benjamin Magalong a marigrigatan ti syudad ken uray iti BGHMC nga isayangkat ti mass testing gapu iti kinakurang dagiti test kits.

Iti panakitungtongna ti media, kinuna ti mayor nga inpakanselarna ti nai-order a test kits iti University of the Philippines gapu iti mano nga isyu kasilpo ti kalidad. Kasta met nga imbingayna nga indeklarar ti RITM nga “un-usable” ti 4,000 a rapid test kits a naidonar iti syudad. ●