: River cruise mairubbuat iti pannakarambak ti Vigan City Festival of the Arts | Tawid News Magazine - Weekly Ilocos News 📰

River cruise mairubbuat iti pannakarambak ti Vigan City Festival of the Arts

VIGAN CITY – Nakasaganan daytoy a siudad a mangrambak iti Viva Vigan Festival of the Arts 2009, kagiddan ti pannakairubbuat ti river cruise iti Mestizo river, daytoy ti impakaammo ni Mayor Eva Marie S. Medina itay lawasna.

Segun ken ni Medina, malaksid iti Binatbatan Festival a daydaywen dagiti turista ken dagiti nadumaduma nga aktibidad iti pannakarambak ti Viva Vigan Festival of the Arts, mai-launch iti Mayo 1 ti river cruise a nairanta saan laeng a pagpallailangan dagiti agindeg, sangsangaili ken turista no di pay pangitandudo iti nabaknang a kultura ken historia ti Vigan City.

Lima nga estasion ti naipattopattok iti river cruise a pakaitampokan ti isasanglad ni Juan de Salcedo iti Vigan; pannakaiyalis ti tugaw ti Arkidioses ti Nueva Segovia manipud Lallo, Cagayan iti Vigan; dagiti tradisional nga industria kas iti panagpanday, panagabel, panagaramid iti burnay ken panagkurti wenno panagaramid iti lalat nga aramiden a sinelas wenno sapatos; dagiti tradisional a makan a kas iti empanada, langgonisa ken dadduma pay a delicacy; ken ti pre-colonial period a pakabuyaan iti panagimaro wenno barter trade sakbay ti yaay dagiti Kastila iti Vigan.

Kinuna ni Medina a nalpasen dagiti 4 nga operational a bangka a makalaon iti sag-15 a pasahero.

Sakbay ti launching, naisayangkat ti maysa a dry run a nailugan dagiti barangay officials ken agnaed iti madalanan ti river cruise ken kamkameng ti media.

Manamnama a makapataud iti pamastrekan ti nasao a river cruise agsipud ta maipasdek iti pagrubbuatan ti bangka dagiti souvenir shops ken panganan iti miki, empanada ken dadduma pay a delicacy ti siudad.

Kanaig daytoy, dinawat ni Medina iti sangguniang panlungsod iti panangipasana iti ordinansa a mangiparit iti agpana ken agpaltog iti karayan a pagdalanan ti bangka para iti seguridad dagiti turista, mangiparit iti panagipakat iti fishing net a maipakurus iti karayan tapno saan a makasalapon iti panagdaliasat ti bangka ken iti pannakaituding ti bayad dagiti pasahero iti river cruise.

Kinuna ni Medina a sabalinto ti bayad ti senior citizen, disabled, ubbing ken estudiante iti river cruise.

Dagiti dadduma pay a naipangruna nga aktibidad iti parambak: May 1 – Trade and Food Exhibit, Craft Exhibit ken Vigan Antique and Furniture Show; Metro Vigan Lakbay Barangay Tourism Fair, Art Exhibits ti Angono artists ken University of Northern Philippines; Carabao Painting Competition; Boklan Arts; Pinningasan iti Manok; Modern Dance Competition; Heritage Singing Idol Contest Finals; May 2 – Beach Volleyball ken Bankathon, Binatbatan Streetdancing Competition ken showdown iti karabianna; May 3 – Calesa Parade, Ramada, Santacruzan, Disco sa Kalye; May 4- Traditional Games; May 5 – Kite Making and Flying Contest.#