Footer

Robbery-hold-up, inside job?

STA. LUCIA, Ilocos Sur – Inside job ti maysa nga anggulo a kitkitaen dagiti polis mainaig iti mapapati a robbery-hold-up a naisayangkat iti national highway ditoy nga ili itay nabiit.

Hinold-ap ti dua a lalaki a nagkalubbon iti motorsiklo ti closed van a nagluganan da Aron Chun y Cho, negosiante, proprietor ti Apollo Pancit Co., Melchor Lamayo y Valdez, ken Richard Resurreccion y Agrisola, 37, drayber ti van, ken residente iti San Isidro, Candon City iti igid ti national highway a sakup ti Barangay Vical idi agarup alas 9:30 ti aldaw ti Pebrero 22.

Segun iti inisial nga inbestigasion dagiti polis, imparking ni Resurreccion ti van iti igid ti national highway a sakup ti Barangay Vical ket bimmabada a napan immisbo.

Idi nagsublida iti van, kellaat a nagparang ti maysa kadagiti suspek sana pinugsitan iti tear gas ti uneg ti van ken ginammatan ti bag a naglaon iti kuarta nga iggem ni Chun ngem naipasa daytoy ken ni Lamayo.

Nagtaray ni Lamayo iti kapagayan ngem kinamat dagiti suspek ket impalladaw ti immuna ti bag.

Idi maalada ti bag, simmakay dagiti suspek iti motorsikloda sada naglibas nga agturong iti Barangay Vical.

Binilin ni Chun a kamaten ni Resurreccion dagiti suspek ngem naippes gayam ti makannawan a kamauna a pilid ti lugan.

Nangisayangkat dagiti polis iti pursuit operation ken nangipatulodda iti flash alarm kadagiti kabangibangda a police stations ngem didan nasapulan dagiti suspek.

Iti pannakaisurat daytoy, di pay ammo ti kinasiasino dagiti mannanakaw.

Madama met ti naing-inget a panagpalutpot dagiti polis no kasano nga ammo dagiti mannanakaw nga adda dakkel a kuarta nga imet ni Chun ken no apay nga ammoda a nagsardeng ti lugan iti nadakamat a barangay.#