Rocket launcher, nasarakan iti igid ti karayan

STA. MARIA, Ilocos Sur – Maysa a rocket launcher ti naireport a nasarakan iti igid ti karayan a sakup ti Barangay Gusing, ditoy nga ili idi malem ti Hulio 21.

Impaima ni Barangay Captain Caroline Iglesias ti rocket launcher wenno bazooka nga addaan live projectile iti uneg ti tubona kadagiti nagresponde a polis.

Segun ken ni Iglesias, nasarakan dagiti ubbing ti rocket launcher wenno bazooka iti igid ti karayan ket nakita ti maysa a lumugar a dagus a nangireport kenkuana iti insidente.

Mapapati a nagaburan ti rocket launcher iti karayan ngem inyanud ti napigsa nga agus iti igid.

Naipan iti police station ti bazooka para iti dokumentasion ken umisu a disposision.#