Latest News: Rolling stores maidanon kadagiti barangay ti Baguio; 4 PUI dakkel ti posibilidad a positibo iti COVID-19 — Magalong | Tawid News Magazine - Weekly Ilocos News 📰

Rolling stores maidanon kadagiti barangay ti Baguio; 4 PUI dakkel ti posibilidad a positibo iti COVID-19 — Magalong

BAGUIO CITY — Maidanon kadagiti barangay dagiti kangrunaan a kasapulan dagiti residente ti Baguio City babaen kadagiti rolling stores a madaman nga isimsimpa ti lokal a gobierno bayat ti panangipatungpal iti Enhanced Community Quarantine (ECQ).

Daytoy ti impasigurado ni Mayor Benjamin Magalong idi Marso 20, bayat iti panangibingayna ti kabaruan a damag iti panangsango ti siudad iti coronavirus disease 2019 (COVID-19).

Dagiti nasao a rolling stores ket mangserbisio iti 128 a barangay ti Baguio a mabingayto iti 12 a distrito. Addaan iti 5 inggana 8 a barangay ti tunggal distrito.

Segun kenni Konsehal Michael Lawana, maisaysayangkaten ti inspeksion kadagiti barangay para kadagiti pagpuestoan ti rolling stores. Kasta met nga addan ti nakatulagda a mangipaay iti suplay para kadagitoy.

Kunana a paset daytoy kadagiti isimsimpa ti lokal a gobierno tapno maliklikan ti panagruar a kanayon dagiti residente.

Malaksid kadagiti groseria, impalgak ni Magalong nga aggatang ti lokal a gobierno kadagiti produkto a nateng dagiti mannalon iti Baguio ken kabangibang a lugar.

Kinuna ti mayor a “next week will be crucial because of food.” Kinunana nga isigurado ti siudad ti pannakaipaay dagiti food packs.

I think we are going to distribute around 1000 food packs a day. So marami pa kaming ididistribute. Aside from the 1000 from DSWD iba pa yung food pack natin, mas marami pa,” palawag ni Magalong.

Segun kenkuana, ti maysa a food pack ket umanay para iti tallo nga aldaw para iti pamilia nga addaan iti lima a kameng.

“Highly probable case”

Impakaamo pay ni Magalong nga adda ti uppat a patient under investigation (PUI) a dakkel ti posibilidad a positibo iti COVID-19. Malaksid pay ti maysa a natay a masuspetsa met laeng a positibo iti nasao a sakit.

Ngem impalawag ti opisial nga ur-urayenda pay ti resulta dagiti naisayangkat a test kadagiti PUI. Kasata met nga awan pay ti pormal a deklarasion ti DOH nga addan ti positibo a kaso ti COVID-19 iti Baguio.

Patienna a no mangrugin ti adu a panangisayangkat ti validation test ket ad-addu pay ngem dagiti nadakamatna a serioso a kaso ti posible nga agpositibo.

Segun iti DOH-CAR, adda laeng ti 100 test kits a naipaay para iti intero a rehion. Simmangpet dagiti kits idi Marso 19. Adda dagitoy iti Baguio General Hospital a nadutukan a secondary testing center.

“Tinitipid natin ang mga ito dahil kulang pero naghahanap tayo ng paraan para makakuha ng karagdagang test kit,” kuna ni Magalong.

Imbingayna a nagkarin ti SM Foundation a mangipaay iti uppat a test kit. Ti tunggal kit ket mabalin nga usaren para iti validation test ti 250 a tattao.

Gapu kadagiti nasao a “highly probable cases,” nairuten nga ipatpatungpal ti siudad ti “mandatory mask wearing.” Minandaranen ni Magalong dagiti pulis a siguradoenda nga amin nga tattao nga adda iti ruar ti balayda ket nakasuot ti mask. Kinunana a gapu ta agkurkurang ken narigat ti makaala iti mask, mabalin nga usaren dagiti improvised mask ken dadduma pay a proteksion.

Kasta met a kiniddaw ti mayor nga agbalin koma nga agresibo dagiti maseknan nga opisial iti panangisayangkat iti contact tracing. Kunana nga apaman koma a makita dagiti doctor ti “red-flags” a dakkel ti posibilidad a positibo ti COVID-19 ti pasiente ket mairugin ti contact tracing uray awan pay ti resulta dagiti test.

Seguridad

Kabayatanna impasigurado met ni Police Colonel Allen Ray Co, hepe ti Baguio City Police Office nga ar-aramidenda ti amin tapno maipatungpal dagiti naiyetnag a tarabay iti pangipatungpal ti ECQ.

Kunana a 2/3 ti pwersa ti kapulisan ket naka-deploy iti siudad bayat nga agin-inana ken nakareserba met ti nabati. Inlawlawag pay ti opisial a numan pay adda dagiti rumrumuar a damag nga adda dagiti agpangpanggep nga agtakaw kadagiti paglakuan, kaaduan kadagitoy ket saan pay a naberipika.

“I assure you that your police officers will protect vital installations,” innayonna.