NASKEN a mapaneknekan a natalged ken nasamay dagiti angkaten ti gobierno ti Pilipinas nga anti-Coronavirus 2019 vaccines tapno maallukoy dagiti umili nga agpabakuna ket makapagsublinton iti “new normal” a panagbiag dagiti Pilipino.
Simmangpeten iti Pilipinas ti 600,000 doses a Sinpvac manipud iti China. Narugianen ti pannakabakuna dagiti dadduma a health workers kadagiti kangrunaan nga ospital ti gobierno sadiay Metro Manila, ken maisarunonton kadagiti dadduma a rehion. Nagpabakunan a mismo ni Vaccines Czar Carlito Galvez ken dadduma pay nga opisial ti Department of Health tapno maallukoyda dagiti umili a natalged ti naaramat a bakuna kadakuada.
Napalalo ti panagyaman ni Presidente Rodrigo Duterte ken Health Secretary Francisco Duque III iti gobierno ti China kadagiti bakuna a donasion nga intulod ti Chinese military cargo plane sadiay Villamor Air Base idi Pebrero 28. Dinaydayawda ti China iti intedda a bakuna a pammaneknek ti nasayaat a pannakigayyem ti China iti Pilipinas.
Dagita ti immuna a Covid-19 vacccine a naisangpet iti pagilian. Inunaanna pay dagiti dadduma a bakuna a partuat ti United States of America kas ti Pfizer ken ti aramid ti United Kingdom nga AstraZeneca a naipadpadamag idi 2020 nga immun-una koma a sumangpet iti Pilipinas.
Pinadpadayawan ni Duterte ti Chinese government iti donasionda a bakuna, saan kano a kas kadagiti dadduma a “Western countries” a napateg unay ti kuarta ken pabor a bayad wenno sukat dagiti bakuna. Ngem manipud pay idi rinugianen dagiti nagduduma a pagilian iti agsukisok para ti bakuna ket aramiden ti China ti impampanakkel ni Duterte nga angkaten ti gobierno ti Pilipinas. Naipadamag pay a ti bakuna a Sinopharm nga aramid met laeng ti China dagiti naipuslit a naibakuna kadagiti kameng ti Presidential Security Group idi Setiembre 2020.
Idi arintapusen ti 2020, impakaammo ni Foreign Affairs Secretary Teodoro Locsin Jr. nga adda nanglapped ti pannakaileppas ti katulagan para ti panagangkat ti bakuna a Pfizer manipud USA. Uray saan nga innaganan ni Locsin ti opisial a nanglapped ti transaksion, inkalintegan ni Duterte ni Duque a maguyguyod iti kontrobersia.
Adu a medical frontliners dagiti agpangadua nga agpabakuna iti Sinovac ta nasurok laeng a 50% ti efficacy-na. Tagibabaenda ti kinasamayna gapu iti kinarisgo ti trabahoda a mangtaming kadagiti pasiente ti Covid-19. Kaykayat dagiti medical frontliners dagiti nasamsamay a bakuna.
Nasayaat ta addan bakuna iti pagilian ken narugianen ti vaccination program ta napanawen ti Pilipinas a mangirugi ti mass vaccination iti South East Asia.
Itay laeng arintapusen ti Pebrero a naputar ti “Covid-19 Vaccination Program Act of 2021” para ti nadardaras a panaggatang ti bakuna ti gobierno, ken panagsungbat ti gobierno kadagiti agsagaba iti nakaro a dakes nga epekto ti bakuna. Dayta ket inikkanna iti kalintegan dagiti lokal a gobierno ken pribado a kompania a makikaysa iti National Government para ti pannakagatang dagiti kayatda a brand ti bakuna. Dagiti makabael a nabaknang a siudad ken probinsia ket kaykayatda ti gumatang kadagiti bakuna a partuat dagiti Western countries uray pay naladladawton ti isasangpet dagiti kayatda a bakuna gapu ta adun a pagilian dagiti nakauna a nakapareserba iti gatangenda.
No dagiti makabael nga LGU ket kaykayatda ti gumatang kadagiti nalatak a brand ti bakuna, dagiti vaccines nga aramid dagiti saan a nalatak a kompania ti mausarton kadagiti umili dagiti napanglaw nga LGU ta awan ti pagpilianda.
Uray no paspasingkedan dagiti health officials ken ti Foods and Drugs Administration a natalged dagiti bakuna, adu umili latta dagiti agamak gapu kadagiti maipadpadamag a dakes nga epektona.
Tapno naballigi ti vaccination program ti pagiian, nasken nga ad-adu nga amang a porsiento dagiti mabakunaan nga umili a mabalin a matudokan iti anti-Covid-19 vaccines. Ngem kasano a magun-od dayta no mismo a dagiti mangbakuna a health workers ket mapilpilitanda wenno saanda a kayat ti bakuna a maitudok kadakuada?
Pudno nga adu dagiti agkasapulan iti bakuna iti intero a lubong ket nainget ti panagkasapulan dagiti nagduduma a pagilian. Dayta ti gapu a nabayag ti pannakaiproseso dagiti magatang a bakuna manipud kadagiti Western countries, ket ti Pilipinas ti kangrunaan a pagangkatanna iti bakuna ket manipud iti China.
Uray no ipasingked ti gobierno a natalged dagiti nakuna a naggapu iti China, masapul nga ikagumaan ti administrasion ti gumatang kadagiti natalged ken epektibo a bakuna nga aramid dagiti dadduma pay a pagilian tapno ad-du a Pilipino dagiti mabakunaan.
Saan koma nga agpannuray lattan ti gobierno kadagiti bakuna manipud China. Nasken met a saan a sobraan a bigbigen ti gobierno nga utang a naimbag a nakem ti Pilipinas dagiti bakuna manipud iti China ta amangan no adda met nalimed a kasukatna. Sapay ket maysa, saan kadi a sadiay Wuhan, China ti nagtaudan ti Covid-19? No pudno a gayyem ti Pilipinas ti China, saan koma nga agserbi nga appan wenno kasukat dagiti ipaayda a bakuna kadagiti saksakupenda a teritorio iti Pilipinas. Saan a mailaksid nga uray iti panaggatang ken pannakaaramat dagiti bakuna ket saan a maikkat ti pinnolitika dagiti nangatuan nga opisial ti gobierno. Nasken ti panagtutunosda tapno nadardaras ti panaggatang ken panagusar ti bakuna a a mangpasardengen iti pandemia.