Ryan corn, adda madadaan a marketna: Gov. Singson

VIGAN CITY – Impanamnama ni Gov. Ryan Singson ti kaadda ti madadaan a pagilakuan dagiti mannalon iti maapitda a Ryan corn.

“No saantayo a tulongan dagiti mannalon iti market ti maisda, sayang laeng ta saanda nga agprogreso,” nakuna ti gobernador.

Segun ken ni Singson, adda memorandum of agreement a kinapinnirmana ti maysa a kompania a nangituding iti P12 a floor price ti mais.

Inyunay-unay ti gobernador a babaen ti nasao a MOA, no bumaba ti presio ti mais iti P12, aggatang latta ti kompania iti naituding a floor price.

Kasta met a no ngumato ti presio ti mais, sumurot ti kompania a gumatang iti mais iti nangatngato a presio, kinuna ni Singson.#