CABUGAO, Ilocos Sur – Naiwaras ti Ryan corn kadagiti rehistrado a mannalon iti mismo a sanguanan ti munisipio ditoy idi Oktubre 9.
Segun iti maysa nga opisial ti Municipal Agriculture Office ditoy, agdagup iti 690 bags a Ryan corn ti naiwaras kadagiti mannalon kas paset ti programa ti gobierno probinsial a mangpadakkel iti produksion ti mais iti probinsia.
Iti pannakipatpatang ti lokal a media ken ni Gov. Ryan Singson, kinunana a naisapsapa ti pannakaited ti Ryan corn tapno maisapsapa a maimula, saan a kas iti napalabas a medio naladaw ti pannakaiwarasda agsipud iti problema iti pannakaibiaheda.
Kinuna pay ni Singson a nagbalin a blacklisted dagiti mannalon a nasukalan a nagilako iti naiwaras kadakuada a Ryan corn ken ganagan.
Innayonna a no immula koma dagitoy a mannalon ti naited a bukel kadakuada, dakdakkel koma ti naganaranda, saan ket a one-time, big-time laeng idi inlakoda dagitoy a naiparabur kadakuada.
Gapu iti panagballigi daytoy a programa ti gobierno probinsial, immawat iti pammadayaw kas outstanding corn grower.#
