Footer

Saan a breakaway group ti TMI Global: presidente

BAGUIO CITY – Saan a break-away group  ti Timpuyog dagiti Mannurat nga Ilokano Global (TMI Global) iti GUMIL Filipinas no di kabinnuyogna iti panangidur-as iti kabukbukodan a pagsasao nangruna ti literatura.

Daytoy ti panangilawlawag ni Franklin Macugay, presidente ti TMI Global, Philippines Chapter, kadagiti nasurok tallopulo a mannurat a timmabuno iti panagsapata dagiti napili a kabarbaro nga opisial ti nasao a gunglo.

Ininaw ni Teresito Tugade, mannurat a tubo ti Marcos (sigud a barangay ti Dingras), Ilocos Norte ngem agnanaeden iti California, USA, ti TMI Global tapno mapatibker pay ti panagsisinninged dagiti amin a mannurat nga Ilokano saan laeng nga iti pagilian no di pay iti sibubukel a lubong.

Nagsapata ken ni Hues Jovencio F. Costales dagiti opisial ti Timpuyog dagiti Mannurat   nga Ilokano Global idi Setiembre 8 iti simple a programa a naangay itay Setiembre 8 ditoy siudad.

Da Atty. Ricardo Olairez, pasado a director ti Labor Arbiter ti Departament of Labor and Employment ti Cordillera Administrative Region, ken Atty. Nellie Olairez  ti nagsangaili iti nasao nga okasion.

Dagiti opisial ti TMI Global: Franklin Macugay, presidente; Dr. Virginia Duldulao, 1st vice president; Julio Belmes, 2nd vice president; Prescillano Bermudez, sekretario-heneral; Romulo Mandac, auditor; Rodelito Ramos, business manager; ken Roy Aragon, chief information officer/web administrator.

Dagiti kameng ti hunta direktiba: Peter La. Julian, chairman; Atty. Nole Lansangan (Isabela); Jaime M. Agpalo, Jr. (Baguio-Benguet); Freddie Masuli (Cagayan); Ruperto Manuel (Nueva Vizcaya); Errol Abrew (La Union); Pete Duldulao (Ilocos Norte); Dr. Jaime Raras (Ilocos Sur); Jaime Lucas (Pangasinan); Mindo Aquino (Isabela); Domingo Duco (Isabela); Lorenzo Tabin Jr. (Metro Manila); .

Legal advisers da Atty. Ricardo Olairez, Atty. Aurelio Galacgac, ken Atty. Nellie Olairez.

Malaksid kadagiti opisial, immatendar dagiti sumaganad: Aurelio Bactad, Luna, Isabela;   Rosemarie de Francia, Baguio City; Pete Duldulao, San Nicolas, Ilocos Norte; Reynaldo Cadangen, Itogon, Benguet; Pedrito Sanidad, Baguio City; Mercedez Bermudez, San Manuel Pangasinan; Virgilio Domaloy, Sison, Pangasinan;  Jovencio Costales, Naguilian, La Union;   ken Clarita Sumahit, Baguio City.

Panangilibro ken panangipatarus iti English kadagiti gapuanan dagiti miembro ti kangrunaan a pangituonan ti imatang ti timpuyog.

Kinuna ni Atty. Nellie Olairez, maysa kadagiti legal adviser ti gunglo, a nasken nga itangsit dagiti sinurat ni Ilokano tapno maammuan ti amin a suli ti lubong iti kinaadda ti puli nga Ilokano a saan a paatiw no literatura ti pagsasaritaan ket ti panangipatarus kadagitoy a sinurat ti kakaisuna a dana a panangsibbol iti daytoy nakabitin nga arapaap.#