Saan a dakes ti agarapaap

Iti State of the Nation Address (SONA) ni Presidente Gloria Macapagal Arroyo, imbatadna a sikukumpiansa nga agbalin ti Filipinas a first world  country iti las-ud ti duapulo a tawen.

Segun kenkuana, nairusaten daytoy a direksion ti pagilian babaen dagiti super regions a pakaibilangan ti North Luzon Agribusiness Quadrangle, ti Metro Luzon Urban Beltway, Central Philippines ken Mindanao, ken ti Cyber Corridor nga imbinsabinsana iti 2006 SONAna. Iti bisionna, agsisinnabat amin dagitoy a super regions iti intero a pagilian babaen ti information technology tapno sapasap ti panagwaras ti panagdur-as, saan a kas kadagiti naglabas a tawtawen a bangking a nakasentro iti Metro Manila.

Iti bision ni Pres. Arroyo, maipasdek dagiti eropuerto, kalsada, rangtay, parke a pampubliko, planta a pagtaudan iti enerhia ken dadduma pay a proyekto agsipud ta dagitoy ti adigi, saan laeng iti natalna a pagilian no di ti moderno nga ekonomia.

Iti kadagupan, makabusbos ti gobierno iti P1.7 trillion.

Pangalaan ti gobierno kadagitoy a kantidad? Sitatalek ti Presidente a nangibatad nga aggapu ti P1-trillion manipud kadagiti pamastrekan ti gobierno babaen ti Bureau of Internal Revenue ken Bureau of Customs; P300 billion manipud kadagiti state corporations; ket ti balanse manipud kadagiti pinansial nga institusion ti gobierno, dagiti investments ti pribado a sektor, lokal a government equity ken dadduma pay a kabulig ti turay.

Sitatalek ti Presidente a nagkuna a magun-odna daytoy a bisionna.

“Naregget a tarigagayko a kaadduanna kadagiti sirmatak nga imbinsabinsak ket naan-anay a magun-od inton bumabaak,” kinuna ti Presidente.

Kinunana pay a tarigagayna a tumipon ti Filipinas iti ranggo dagiti nabaknang a pagilian iti las-ud ti duapulo a tawen ta iti dayta a panawen, naipaigiden ti kinapanglaw ket naitag-ayen dagiti marginalized iti nasalun-at a nagtengnga a klase.

Ti saludsod: mapaadda ngata dagiti pundo a busbosen ti gobierno iti baet a saan a matun-oyan dagiti ahensia a nakaipabaklayan iti pamastrekan ti pagilian ti puntiriada a koleksion?

Ita pay, posible a dumakkel ti depisit ti turay agsipud ta nagkamtud ti nakolekta ti BIR ken Customs idinto a  sangkaballing laeng ti mapaspastrek, no adda man , dagiti nadumaduma a korporasion ti turay.

Tapno malitupan ti turay ti depisitna, kapilitan nga ingatona manen ti buis wenno umutang wenno agilako kadagiti sanikuana. Ngem kastay kunada, makarsan pay uray naburnok nga ubbog.

Ala, saan a dakes nga agarapaap ti Presidente a dumur-as ti pagilian ken sumayaat ti klase ti panagbiag dagiti umili.

Ngem ti makadakes no tun-oyenna dagitoy nga arapaapna babaen ti pannakaipakat ti ad-adu a buis nga ad-adda a mangparigat kadagiti umili.

Ambisioso ti bision ni Pres. Arroyo. Sapay koma ta saan nga agbalin a nadagsen a krus iti abaga dagiti umili ti pannakagun-od daytoy a sirmatana.#