Saan a maikutkot ti kinapudno (Maudi a paset)

“Agpalaud wenno agpadaya nga agpaili?” inamad ni Rudy.

“Agpaili, kasta ti kunada.”

Pinagandar ni Rudy ti dyip. Nagpaili. Nagtarus iti terminal ti Pantran.

“Sino ti guardia idi rabii ti Hulio 8, Manong?” inamadna iti lakay a guardia.

Kinita ti guardia ti rekordna. “Ni Johnny, sir,” insungbatna. “Apay kadi?”

Impudno ni Rudy ti panggepna. “Pakasarakak kenkuana?”

“Kitaem iti pagdagusanna,” kinuna ti guardia. “23 Sikatuna Street”

Nagyaman ni Rudy. Binirokna ti balay. Agbasbasa ni Johnny iti Tawid News Magasin iti nailet a salas.

Imbaga ni Rudy ti gagarana. “Lagipem koma a nalaing,” kinunana, “no sino ti nangsukon ken ni Liza. Agassawa a nataengan? Nagtraysikelda a pimmanaw, saan?”

“Matandaanak!” kinuna ni Johnny. “Lalaki ti nangsukon iti kabsatmo. Agmaymaysa. Naglugan iti dyip. Aggudenggudeng ti babai a simmurot.”

“Mailasinmo ti dyip wenno ti lalaki no makitam?”

Nagtung-ed ti guardia. “Malasinko ti markana a Tres Marias iti sango.”

“Agyamanak, giem,” tinapik ni Rudy ti abaga ni Johnny. “Dakkel ti naitulongmo iti pannakasolbar ti pannakapapatay dagiti dadakkelko.”

Nagtarus ni Rudy iti opisina ni Hepe dela Cuadra.

“Maysa laeng ti saludsodek tapno patalgedak ti suspetsak. Simmangnguan ti dyip idi sumangpetkayo iti crime scene, Hepe?”

“Simmango iti laud. Adda nasagapmo a lead para iti pannakarisut ti kaso?”

“Ammokon ti kriminal, Hepe. Ngem masapulko ti tulongmo tapno matnag iti palab-og.”

Impalawag ni Rudy ti planona. Nagtungtung-ed ni Hepe dela Cuadra.

“Medio risky,” kinunana, “ngem umabuloyak tapno matiliw ti sinalbag a nangpapatay kadagiti dadakkelmo ken nangrames iti kabsatmo!”

SUMANENGSENG ti lamok ngem di nagkir-in ni Rudy iti nagtakderanna. Nasipnget iti nagkul-obanna. Dandanin alas onse ti rabii.

Pinatademna ti panagkitana. Ngem malaksid kadagiti uni dagiti kuriat, awan ti karkarna a mapaliiwna.

Itay malem, inyawiddan ni Liza. Impakaammona kadagiti kaarrubada nga aglimbongen ti panunot ti kabsatna ket impasingked ti doktor a malagipnanton dagiti pasamak a nagtungpal iti trahedia.

Nagrippiis ti nabaddekan a nagango a bulong iti asideg ti kasabaan. Nagpaliiw idinto a tumanamboren ti barukongna.

Nasunotan ti rippiis. Madamdama, nasiputanna ti anniniwan a timmaray a nagkul-ob iti puon ti kaimito iti asideg ti tawa ti siled ni Liza.

Immuli ti anniniwan iti kaimito, nagpallayog iti kasla gurong a sanga ket timmapuak iti siled.

Timmaray ni Rudy a simmapideng iti kaimito idinto a binallaaganna ni Hepe dela Cuadra babaen ti selponna.

Kellaat, naluktan dagiti silaw. Adda nagkanabtuog iti siled. Nakitana ti timmapuak a lalaki.

Ngem nakasaganan ni Rudy. Pinasabtanna ti anniniwan iti disnog. Nabaliktad ti lalaki ngem pinilitna ti bimmangon. Pinatimidan ni Rudy ti lalaki ket kasla tukak a nadaluson iti daga.

Umanangsab ni Hepe dela Cuadra ken sumagmamano a polis nga immasideg.

“Addayta ti kriminal, Hepe,” kinuna ni Rudy.

Sinilawan ni Hepe dela Cuadra ti kriminal. Ni Andy!

“Kasano a sinuspetsam ni Andy?” inamad ni Hepe dela Cuadra idinto a pinosasanna ni Andy.

“Nangrugi ti suspetsak idi nagbuteng ni Liza a nakakita kenkuana. Naamirisko a saan a ti rupa ti kaayan-ayatna ti nakitana no di rupa ti rapist ken kriminal.”

“Ania ti motibo?”

“Ni Liza ti pakaammuanto. Ngem malagipmo di intext ni Liza, Hepe? Dakkel ti pammatik a kayat ni Liza ti makiwinnaswas ken ni Andy. Ngem naduktalan ni Andy. Kinomprontana ni Papang ket nagsubangda. Binagsol ni Andy dagiti dadakkelko sana napan sinukon ni Liza. Imbanagna ti nangisit a panggepna sana binagbagsol. Ngem nakalasat ni Liza nupay nadadael ti panunotna. Dayta ti dinandanag ni Andy. Masinunuok a no naikkan iti gundaway, papatayenna ni Liza tapno makalubanna ti inaramidna.

“Testigo dagiti mannalon nga alas nuebe treinta idi mapapatay dagiti dadakkelko sa iti kaadda ti pimmanaw a lugan. Kayatna a sawen, saan a nadadael ti lugan kas imbaga ni Andy, no di daytoy pay ti inaramatna a nangsukon ken ni Liza.

“Ngem ni Liza ti kangrunaan a mangiremrem ken ni Andy. Ket idi imbagak a mangrugin nga aglimbong ti panunotna, nagtignay a dagus a mangpatay iti kabsatko. Dina ammo a pinakatantayo iti palab-og.”

“Poliska koma, saan a ketdi a kolumnista,” kinuna ni Hepe dela Cuadra. “Dagiti kas kenka ti kasapulanmi.”

“The credit is yours iti pannakarisut ti krimen, Hepe,” kinuna ni Rudy. “Yadayoyon dayta a kriminal ta diakto ket madisnog!”#