Saan a mailinteg ti biddut ti sabali a biddut (Maudi a paset)

Ababa a Sarita ni Ronald M. Azurin

 “ADDAN ni Daddy!” nagtaray a simmabat dagiti annak ni Mark idi tumapog iti salas. Rinakep ni Janelyn ti luppona idinto a nagpasallabay ni Jongjong. Naglaglagtoda idi iruarna ti pasarabona.

“Ni Mamangyo?” inamadna.

“‘Pan nakitienda, Daddy,” insungbat ni Janelyn.

“ ‘Mom, Dad, nakitak nga agsangsangit ni Mommy,” impulong ni Jongjong.

“Apayen?” adda nagparikna ken ni Mark. Naduktalan ngatan ni Marie ti panagulbodna?

“ ‘Mok man, Daddy.”

“Addaka gayamen,” nagtimek ni Marie manipud iti ridaw. Di pay immisem. Inlisina ti pingpingna idi bisongen ni Mark. Nagtarus iti kusina.

Sinurot ni Mark ni baketna. Nadatnganna nga idepdeppel daytoy ti tammudona iti suli ti matana.

“Pagsangitam?” nakuna ni Mark.

“Dika aglibaken,” inkusilap ni Marie. “Kinasinnarakmo ti kulasisim, ‘nia?”

“Ti la mapampanunotmo.”

“Kinapudnona, nabayagen a maal-alimadmadko nga adda babaim. Diak idi intaltalek ta dakkel ti panagtalekko kenka. Ngem mangrugin a mamatiak iti damag.”

“Patpatiem met,” nakuna ni Mark. “Ti kunam, maituredka nga isukat?”

NAGKIRIRING ti telepono iti lamisaan ni Mark. Pinidutna ti auditibo. Kellaat a nagtalangkiaw idi mailasinna ti timek ni Liza. Inapputna ti auditibo.

“Apay nga immawagka?” namedmed ti timekna.

“Di la mabalin nga agkitata?” makasangsangit ti timek ni Liza.

“Oras ti opisina,” kinuna ni Mark. “Ken dumlawen ni Marie.”

“Adda nasken a pagpatanganta.”

“Ibagamon.”

“Nabartek ni Dante,” kinuna ni Liza. “Dinissuannak. Diakon nakapagteppel ket imper-akko nga agsinakamin.”

Saan a nakatimek ni Mark.

“No pudno met laeng nga ay-ayatennak, iyadayonak. Mangabaruananta iti sabali a disso.”

“N-nadagsen ti dawdawatem,” kinuna ni Mark.

“Nawadwad ti urnongko. Agbiagta a sinanam-ay.”

Naapiras ni Mark ti timidna. Panagriknana, kasla naipit iti nagbaetan ti dua a bato!

“Urayek ti pangnged-dengmo.”

“Panunotek pay.”

“Umawagak inton bigat,” kinuna ni Liza. “Nakasagana koman ti sungbatmo.”

ADALEMEN ti rabii ngem naatap ti riridepan ni Mark. Agsalsalip ti pusona ken ti konsensiana.

Bimmangon ket kinarawana ti sigarilio iti lamisaan. Nagsindi idinto nga insaruagna ti panagkitana iti ruar. Mangliwengliweng ti sipnget a nangsallukob iti kabalbalayan.

Nagminar iti isipna ni Marie: naanus ken mapagtalkan nga asawa. Ngem simmallin ni Liza: nabanglo, makagargari.

“Alusiisenka,” nagtimek ni Marie. “Adda kadi problemam?”

“Awan,” inyulbod ni Mark.

“Am-ammokan manipud ulo agingga iti dapan,” kinuna ni Marie. “Adda la ketdi nauneg a parikutmo. Ibagam koma tapno matulonganka.”

“D-dakayo ti pampanunotek. Maidestinoak iti adayo. Mapanawankayo.”

“Dayta la gayam,” kinuna ni Marie. “Dinakam’ pakariribukan. We can manage. Agpaay met la iti masakbayantayo ti panagsakripisiota, saan kadi?”

Adda nakalbit iti kaunggan ni Mark. Ngem napigsa ti guyod ni Liza!

INSOBRE ni Mark ti suratna nga aglusulos iti opisina. Yawatnanto ken ni Mr. Marquez, ti superbisorna.

Nagkiriring ti telepono. Ginammatanna ti auditibo. Ti sekretariana ti umaw-awag.

“Maysa a Mr. Edgar Aleson ti kayatna ti makisarita kenka, sir,” imbaga ti sekretaria.

Nagkuretret ti muging ni Mark. Nalagipna daydi lalaki a nakasinnukatna iti bag.

“Pastrekem,” kinunana.

Umis-isem ni Edgar a simrek. Nalapsat ti babai nga immaklili kenkuana.

“Kumusta, Mr. Aleson?” timmakder ni Mark ket intanggayana ti dakulapna. Pinagtugawna dagiti dua. Nagpayuneg iti pagpalamiis iti sekretariana. Inyam-ammo ni Edgar ni Angelica nga asawana.

“Ammok nga adu ti trabahom isu a diakon agpalpalikaw,” kinuna ni Edgar. “Umaydaka awisen iti pabuniag ni Jun…damomi nga anak kalpasan ti walo a tawen a panagur-uraymi.”

“Diak mawatan,” nakuna ni Mark. “Di met ni…”

“Ammok a masdaawka,” immisem ni Edgar. “Well, isalaysayko kenka…”

Limmamiis ti panaglangen da Edgar ken Angelica ta dida maparaburan iti anak. Nasursuro ni Edgar ti naginum. Naam-ammona ni Lilibeth iti night club a masansan a paginumanna. Nagkinnaawatanda. Nagtulagda nga umadayo. Ngem ti bag ni Mark ti napidut ni Edgar ket saan a nakasurot iti biahe ti eroplano a paglugananda koma ken ni Lilibeth nga agpa-Los Angeles. Bimtak ti eroplano ket natay amin a pasahero. Nagsubli ni Edgar iti asawana ket dimmawat iti pammakawan.

“Agyamanak ta mannakaawat ni Angelica,” inggibus ni Edgar. “Ita, naragsaken ti taengmi ta addan saringit a nangpatapat iti ayan-ayatmi.”

“Blessing in disguise ti napasamak kenka, Mr. Aleson,” nakuna ni Mark.

“Mannakabalin ti Dios, Mark,” kinuna ni Edgar. “Agyamanak ta inikkannak iti gundaway a mangatur iti biddutko.”

“I’m glad for both of you,” nakuna ni Mark.

Saanen a nagbayag da Edgar. Inyunay-unayna ti itatabuno ni Mark iti pabuniag.

Nabayagdan a nakapanaw ngem nakamuttaleng pay laeng ni Mark iti lamisaanna. Immukuok iti panunotna ti insalaysay ni Edgar.

Nagkiriring ti telepono. Pinidutna ti auditibo. Ni Liza.

“Ania ti pangngeddengmo?” inamad ni Liza.

“I’m sorry, Liza,” sitatalingenngen nga insungbat ni Mark. “Napatpateg ti pamiliak ngem sika.”

Indissona ti audititbo. Nakalaglag-an ti riknana a nangpigis iti suratna nga aglusulos.#