Footer

Saan a marijuana country ti Sugpon: konsehal

SUGPON, Ilocos Sur – Linagidaw dagiti opisial ditoy ti agtultuloy a pannakabirngas ti ilida a kas pagtataudan iti droga a marihuana.

Kinuna ni Sangguniang Bayan Member Rene Lubrin bayat iti interbio kenkuana ti Tawid News a mapunas koma daytoy dakes nga imahe ti ilida agsipud ta saan met laeng a ditoy ti pakaimulmulaan ti marihuana.

“Ti problema ngamin, no adda dagiti maiparuar a damag a maraut a plantasion ti marihuana, ibagada a sakup ti Sugpon; koma, ispesipiko nga ibagada ti lugar  tapno saan met unay a madagsenan ti lugarmi,” kinuna ni Lubrin idinto nga inyunay-unayna a kaadduanna a mararaut a plantasion ti marihuana ket masarakan iti nagbeddengan ti Ilocos Sur ken Benguet.

Kinunana a maapektaranda nga agnaed ta no ibagada a Sugpon ti ilida, ti umuna a sumrek iti panunot dagiti tattao ket lugar a pakaimulmulaan iti marihuana.

“No ibagada a marijuana country ti Sugpon, madi met ti riknami ta saankami met nga agmulmula iti marihuana,” kinuna ni Lubrin.

Innayonna a sagsagrapen met uray dagiti estudiante a taga-Sugpon nga agbasbasa iti sabali nga ili ti dakes nga epekto dagiti damag a pakaimulmulaan iti marihuana ti lugarda.

Kiniddaw ti konsehal ti tulong dagiti pagiwarnak tapno maatur ti dakes nga imahe ti ilida a pinarnuay dagiti saan a pudno a damag.#