Iti Duyog ti Singasing: Saan a naimut dagiti artists (Maudi a paset) | Tawid News Magazine - Weekly Ilocos News 📰

Saan a naimut dagiti artists (Maudi a paset)

Nabayag a nagpampanunot, nanglaglagip, idi kuan medio nagrupanget, a kasla ketdin naitdalan iti mulmulmolan ti mugingna, ket kinunana: “Tungkol saan?”

Iti panunotko, nabasana la ketdi ti daniw, yes!

“Tungkol po sa marapait…!” kinunak met nga adda pay kabuyogna a palastog (ta kadagidi a tiempo ket nangato ti kompiansatayo). Isu a nangato met iti mugingtayo ti banagen ti daniwtayo; ti kayattayo nga idur-as ken pasantaken.

Immigup iti kapena, ngem kasla nakapapait ti inna natilmon. No maipapan iti sabong a marapait ti daniw, kasla nakapapait met ti panangtilmonna iti kapena. Yos, nakaangotak iti ginelgel a baraniw, madin sa? Minatmatak dagiti kaduami, da Pedrito Sanidad ken Art Castro ken (daydi) Bagnos Cudiamat, dida met matimtimek nga agur-uray iti sawenna.

Idi kuan, kunana: “Sayang ang ipinambayad mo ng selyo…kape na lang sana…!”

Ket napno ti garakgakmi iti restaurant ni (daydi) Ah Kong, a napataliaw pay lalo idi nagiinnapirkami kadagiti kakaduak iti GUMIL Baguio.

Immisem. Nabagas ti panagkitana kaniak.

Apay nga agkatawaak? Negatibo ti komento ngem nagbalin pay laeng a nasin-aw a komentario! Saan nga amin a kritisismo ken komentario ket panangidayaw no di panangibaga met iti agdadata a kinapudno a makaited iti panagbalbaliw nga agturong iti pannakapnek. No awan ti mangibaga kadagiti biddut ken madi, kasano ngarud ti pannakaammo nga adda biddut ken madi? Saan a makaadayo dagiti dina ammo ti umawat iti nagbiddutanna.

Nairuamakon iti rejection. Adda pay dagiti sinuratko a naganko laeng ken adres ti saan a naedit ken nagusoguson iti kopunban nga inin-inutko a tinulnetulnekan iti makinilia. Adda pay nangedit iti nagan ken adresko! Ha-ha-ha! Biag ti agsursuro nga agsurat, aya, nagrigat!

Wen, ineditda ti nagan ken adresko. Karbenganda dayta ta impakitada laeng ti saan a makita a kinapudno, nga ibagbagada laeng ti sangaduyog a singasing nga addaan iti kaipapanan. (Basaen ti kanayonan a detalye iti salaysayko sadiay www.iluko.com “Pati Nagan Ken Adresko, Ineditda, Kailian!”).

No nakapuy laeng ti pakinakem, awan koma ti makuna a tugot met iti panangtangtangadtayo iti langit no tumayab met ti imahinasiontayo; sabali man met ti pagkayabkaban a kinelleng ta di laeng iti radio ken radio lattan ti pagbasakbasakan.

Saanak nga agkudkudil a sibuyas wenno onion skin a kunada, ammok nga awaten ti biddutko, dagita a biddut ti nangiduron kaniak a tumapaw iti panagsuratan ken maiyam-ammo ti naganko. No rejection laeng ti pagsasaritaan, adun ti kapadasak. Awan ti agsursuro a saan a masugatan, masugatanto pay dagiti nalaingen, anianto la ket dagitin agsursuro? Tunggal aramid, adda latta ti panawen a panagsursuro ta saan met nga insigida nga ammom ti amin; nasken ti panangikabisadom ti dalan a serkem tapno ammomto met laeng ti ruaram.

Uray idi nagipatulodak iti Home Life Family Magazine, naanus ti dekano iti Humanities iti University of the Philippines Visayas a masarakan sadiay Miag-ao, Iloilo nga agedit kadagiti ipatpatulodko, nangted iti suggestion, a tinungpalko met a nakagun-odantayo iti umuna a pammadayaw. Isu ti poetry editor. No ti dekano ti UP Visayas ket saanna nga inyimut ti talentona, laingna, ti panawenna agraman ti pagbayadna iti selio, sobre, kopunban ken plete a mapan iti post office, saanko koma a natun-oyan dagiti arapaapko a gun-oden iti panagsuratko.

No maminsan, ad-adda a dagiti saanko nga ammo wenno dagiti kayatko a maammuan ti isuratko ta editendanto met laeng, saan? Ibagada ti kayatda a maammuan.

Dayta ti kayattayo met a maala ken Dr. Bautista. Impalawagko ti kapanunotak ken ni Dr. Bautista, a dagiti rejection ket isuda ti ad-adda a makaited iti inspirasion tapno umamnut ti plumak. Ket idi tawen 2000, naaddaantayo iti espasio iti kulomna iti Panorama Magazine. At last! Kas Carlos Palanca Awardee pay.

Ti sabali pay a Gawad CCP Para Sa Sining a naasideg kadatayo ken saan a nagpaidam a nangited kadagiti sinursuratna, dagiti sinukisokna ken dadduma pay nga impormasion ket ni Dr. Florentino H. Hornedo, maysa nga Ivatan ngem adu dagiti sinursuratna maipapan kadagiti Ilokano ken dagiti Bago ken dadduma pay.

Saanko a naam-ammo iti personal ni Dr. Hornedo; ni (daydi) Prof. Felino Llorente ti nangiyam-ammo kaniak babaen ti surat. Ni Prof. Llorente ti editor ti SLU Research Journal of the Graduate School. Nagam-ammokami ken professor ta mannurat met iti Bannawag ken nangited kadagiti dadduma nga innak kasapulan idi naammuanna nga agsuksukisokak iti maipapan kadagiti Bago. Kada petsa 15 ken 30 a dumalanak iti opisinana, ta malabasak daytoy no mapanak agpapirma iti voucher iti SLU Hospital ken ni Fr. Gaden, ta scriptwriter ti trabahok iti MPBC.

Saan a naimut dagiti pudpudno nga artists, libre la ngarud ti panangisurodan, aggastoda pay iti selio, papel ken plete a mapan agibuson ken panawenda. Saanda a naimut para iti panagsantak ti literatura, saanda a naimut kadagiti mayat nga agsursuro. Kasta ti kinapateg kadakuada ti tinapoganda nga arte. Isu a kaimudinganda ti lampara iti nasipnget a dana. Isuda dagiti saanto a pulos a malipatan.#