Saan a naimut dagiti artists (Umuna a paset)

Malagipko man ida, isuda a saan a sineknan iti imut ken saan a nagpangaddua a nangipaay iti dinuyduyog a talento kadagiti naresga a tumapog iti bangkag ti panagsuratan.  Naisangsangayan ti gapuananda ta saanda a pinanunot a ti impaayda a tulong ken pannarabay ket agsubli kadakuada lalo kadagiti sumingsingising ken kumarkaramut iti bangkag ti panagsuratan.

Napadasak met ti naarbisan iti pannarabay dagitoy a henio, nga isu ti intay man lagipen iti daytoy a sinurat. Intay kaw-iden ti naisangsangayan a selebrasion ti CCP, ti panangipaayda kadagiti pammadayaw iti daytoy a tawen.

Kada tallo a tawen a mapasamak ti panangipaay ti Gawad CCP Para Sa Sining, ti kangatuan nga award nga ipaay ti Cultural Center of the Philippines nga agpaay kadagiti artists a saan a nagpatingga ti panangipadigoda kadagiti talentoda ken nangnayon iti pannakapabaknang ti arte nga inda tinakunaynay ken intaguyod iti bukodda a wagas. Kasta met a maipaay pay iti asinoman a gunglo a nakaipaay iti naidumduma a pannaranay, panangtarabay ken panangmuli kadagiti artists.

Saan a magatadan dagiti gapuanan dagitoy nga awardees ket rumbeng la unay a maikkanda met iti kaimudinganda a respeto,  panangitandudo  ken pannakkel tapno ad-adda nga agsantak ti arte; tapno ad-adu pay dagiti tumaud nga artist iti sumarsaruno a kaputotan. Dagiti gapuanan dagitoy a Gawad CCP Para Sa Sining Awardees ket dagiti nabubun-as a tugot a paganninawan iti agdama a panawen.

Kadagiti pito nga indibidual a naipaayan iti pammadayaw, sidadayawkami a mangsaludo kadakayo, apo, agbiagkayo…!

Lalo kadagiti dua nga awardees a nakaited iti dakkel a tulong ken pannarabay iti intay panagsuratsurat; wen, dua kadagitoy ti nangipaay iti pannarabay ken kibin tapno intayo met agdalapdap iti dana ti panagsuratan; nga isu man ti intay lagipen…

Ti maysa ket nakaited iti paratignay, inspirasion ken saldet ‘toy numo nga agpursige nga agsursuro nga agputar iti daniw. Ti daniw a naibudi iti biagtayo, ta ammotayon, marikriknatayo a ti biag ket maysa a daniw. Dayta ti ammotayo a kaipapanan ti daniw. No ti biag ket maysa a daniw, nasken ngarud nga idaniw ti biag; no idaniw, nasken ngarud a mabasa ken maipakita dayta a daniw. Laeng a, ti parikut, ket ti aprisesion wenno pannakabigbig—no maapresiar a nalaing ti daniw wenno saan man laeng a tinaliaw wenno ania la ditan a kaimudinganna. Iti daytoy a punto, nasisita la unay ti balakad ken pannarabay dagiti eksperto.

Ti maysa met ket saan a nagpangadua a nangipatulod kadagiti materiales a suraten, dagiti suksukisoken a bambanag, lalo iti maipapan dagiti Bago ken dagiti epiko itoy. Tinudingannatayo ngamin ti publisher ti Tribu Magazine ken Tribu News, (daydi) Roger Salibad ken kasta metten dagiti sumagmamano a panglakayen iti Bago Cultural Society nga agurnong iti maipapan iti tribu, dagiti sinurat maipapan kadakuada, ti literaturada, a kas pammaneknek-pammati iti presensiada iti gimong. Dagiti sinukisok nga inur-urnong ken sinursurattayo ket naipablaakda iti Tribu Magazine, Bannawag, Amburayan Chronicle, Saringit Chronicle, Tawid News Magasin ken mabasa pay iti www.kamaligblogspot.com dagiti dadduma a babasaen nga intay nagkontribiutan ken nangisubmitaran kadagiti intay sinukisok.

Pito a tao ken maysa a gunglo dagiti mannurat iti naipaayan iti pammadayaw idi sardam ti Pebrero 27 sadiay CCP Tanghalang Nicanor Abelardo (Main Theater). Isuda ti nakaipaay iti dinto magatadan a kontribusion iti Philippine arts and culture.

Dagiti napadayawan, isuda: Zeneida A. Amador for Theater; Cirilo F. Bautista for Literature; Brenda V. Fajardo for Visual Arts; Agnes Locsin for Dance, Ramon P. Santos for Music; Rodolfo “Dolphy” Quizon for Film and Broadcast Arts; Florentino H. Hornedo for Cultural Anthropology ken ti The Silliman University National Writers Workshop, Tanging Parangal for Arts Training and Education.

Iti daytoy a sinurat, intay ibuksilan ti dakkel a naitulong ni Dr. Cirilo F. Bautista iti innak panagputaran iti daniw; 90s idi makasaritak iti personal babaen kenni Baguio photojournalist, Art Castro, iti uneg ti kalatakan a watering hole kadagidi a tiempo, ti Dainty Restaurant. Kada Domingo a basaentayo ti kolum ni Dr. Bautista iti Panorama Magazine, ta tagipintasek la unay ti istilona nga agited iti kritisismo ken panirigan.

Kunam man, kayatko met a, ti makaipablaak iti daniw iti nalatak a magazine. Dakkel a nagan no makaipablaakka iti nasional. Adda met  dagiti sumagmamano a naipablaaktayo a daniw a Tagalog kadagiti komkomiks. Nangipatulodak met a, iti Panorama Magazine.

Kunam pay, idi inyam-ammo ni Art Castro, ginundawayakon a dinamag no ania ti binanag ti impatulodko kenkuana a daniw. Ania la ketdin, impalapalko pay laeng iti nakanganga a tawa dayta bain ta ditato met ilukmeg no di ket ikuttong ti arapaap.

(Maituloyto)