Saan a ti Sugpon pakaparparutan marihuana: mayor

VIGAN CITY – Linagidaw ti mayor iti maysa nga upland town ti pannakadakamat ti ilina a paggapgapuan dagiti maparparut a mula a marihuana.

Kiniddaw ni Sugpon Mayor Fernando Quiton bayat ti miting ti Regional Peace and Order Council a naangay idi Marso 17 iti Baluarte ditoy siudad ti pannakailinteg dagiti damag a ti ilida ti paggapgpuan dagiti maparparut a mula a marihuana a kunana a mangmangted iti dakes nga imahe iti ilida.

Indauluan ni Gov. Luis “Chavit” Singson, RPOC chairman ti nasao a miting a  dinar-ayan da Maj. Gen. Ireneo Espino,  Commanding General, 7th Infantry Division, Phil. Army, PNP Regional Director Police Chief Supt. Franklin Jesus Bucayu, Pangasinan Gov. Amado Espino ken dadduma pay nga opisial ti probinsia ken munisipalidad.

Linawlawagan ni Quiton a saan a ti ilida a Sugpon ti pakaparparutan dagiti mula a marihuana no di iti paset ti Bakun ken Kibungan, Benguet.

Kinuna ti mayor a gapu ta iti  laeng ilida ti dalan a mabalin a pagisalogan dagiti nagreid a polis kadagiti naparutda a mula a marihuana kadagiti plantasion iti paset ti Bakun ken Kibungan, Benguet, agparparang  metten nga iti ilida ti naggapuan dagitoy.

Dinawat ni Quiton nga ibaga koma ti PNP ti husto a lugar a naggapuan dagiti naparut a mula a marihuana agsipud ta negatibo ti imahe nga ipapaayna iti ilida kadagiti makabasa kadagiti report ken damag kadagiti pagiwarnak.

Masansan a rauten dagiti pannakabagi ti linteg dagiti plantasion ti marihuana a maimulmula iti tri-boundary ti Sugpon, Ilocos Sur, Benguet ken La Union.

Kabayatanna, dinawat ni Vice Gov. Deogracias Victor  Savellano a mangipasa koma ti Regional Peace and Order Council iti maysa a resolusion a maiturong ken ni Presidente Benigno Aquino III a mangkiddaw a ti laengen abel iloko nga ules ti aramaten nga ules dagiti kameng ti armada ti pagilian imbes nga agangkatda pay laeng sadiay Vietnam.

Kinuna ni Savellano a dakkel a tulong ti panangaramat dagiti kameng iti armada ti pagilian ti ules a partuat ti Ilocos Sur para iti ekonomia ti probinsia ken makatulong daytoy tapno mabiag ti industria ti abel.

Insungbat ni Maj. Gen.  Espino nga ipatangnanto iti headquarters ti dawat ni Savellano para iti pannakaaksionna.#