sinursuran-banner-sqSinursuranNi Jobert M. Pacnis

Saan la koman a nasemento ti dalanmi

WEN, kaykayatko la koman a di nasemsemento ti kalsadami.

Apayen, mabalin pay ketdi nga ilibbim, kailian.

Aklonek, inar-arapaapko idi a masuktan koma metten ti buttabuttaw nga aspaltado a kalsada nga agturong iti bariomi. Ken makaraman la koma iti uray gabur laeng dagiti secondary roads.

Ammotayo met, kailian, no ania ti pagimbagan ti nasimpa a kalsada. Saan laeng a mapapardas ti pannakayudong dagiti produkto. Mapapardas pay ti pannakaipan iti pagagasan dagiti kailian kadagiti emerhensia a situasion.

Nanam-ay ngatan ti agbiahe. Saanen a maramanan ti agpulbos iti tapok no kalgaw ken mapitakan no nepnep. Saan payen a makipatintero kadagiti lubnak ken buttaw kadagiti pagsungkaan a kalsada. Mabalinen nga ipadpad-eng ti mapan iti rantaen. Saanen nga adu nga oras ti maibus iti biahe.

Itoy a kaadda ti programa ti gobierno a Build! Build! Build!, pimmudno ti arapaap a pannakasemento ti haywey (provincial road) manipud sentro nga agturong iti nanumo a bariomi. Uray payen dagiti dua (maysa a dumna iti kataltalonan iti abagatan ken maysa a dumna iti baybay iti amianan) a municipal roads a ka-parallel daytoy.

Saan laeng a dayta. Pati dagiti lipit a sumrek kadagiti purok, mailepleppasda aminen. Ti laengen agpabaybay a sumrek iti purokmi (nagbedngan ti bariomi ken ti Brgy. Sta. Cruz) ti saan. Ngem iti mismo a purok, kailepleppas ti lipit a kahilera met laeng ti municipal road iti amianan.

Adayo nga impatomi a mapasamak dagitoy a pannakasemento dagiti kalsadami. Ta iti no manon a tawen nga eleksion ti naglabas, a nakasamsam-it dagiti kari dagiti papili, awan latta met ti nauraymi.

Kadagitoy laengen!

Ti laeng idawdawatmi la unay idi, uray ti aspaltado laeng a provincial road ti masemento koma. Pinakaro ngaminen dagiti dadakkel a lugan idi kapades ti pannakabunag dagiti darat iti barangay ti sumaruno nga ili iti dayaenmi. Tinawen nga adda aglutluto iti aspalto nga itapalda kadagiti abut. Ngem apagbiit laeng, agabutto manen. Kasano, madlaw a kinumaw dagidi akimproyekto. Nakaing-ingpis met gayam ti aspaltona. Ad-adu dagiti bato ken darat a kuankuansit a pinaaruyotanda laeng iti aspalto.

Di kad’ naglaka nga agbuttaw ken aglikkab.

Nadlawmi idi daytan idi addakami pay iti elementaria. Binnaragan iti tsinelas (ismagel, kunami) ti maysa idi a pagaayatmi nga ay-ayam. Awan pay ti selpon a mangagaw iti orasmi. No katingra ti mulagat ti init iti tengnga ti aldaw, agsukilkami kadagiti malunlunag nga aspalto iti igid ti kalsada. Itapalmi daytoy iti suelas ti ismagelmi.

Ket dita a madmadlawmi a nagingpis gayam ti aspalto ti kalsada.

Ar-aramidenmi dayta tapno dumagsen ket nalaka a maipakkak dagiti matiruan nga ismagel nga amanmi. Madusa ngamin ti maabak!

Ngem dagita met nga aspalto kadagiti ismagelmi ti nakababautanmi! Nakaunget ti maestrami idi ta kumayaskas dagiti ismagelmi a simrek iti klasena. Nakapungtot ket pinaglilinianakami a binaut iti sangkaitugotna nga agmaysa metro a nakayasan a kawayan a pagbautna. Adda naalibtak a kaklasemi a daras nangipan iti notbukna iti likudna. Nakaisem laeng idi mabaut.

Ngem nadlaw ti maestrami ti impanna iti likudna. Pinaikkatna daytoy. Dinoblena a binaut. Napigpigsan. Nagmangit kalpasanna.

Ngem no apay a kaykayatko a di la koman nasemento ti kalsadami, kastoy man, kailian:

Nagruar dagiti aggagatel nga agmaneho nga agtutubo. Permi a pawengwengenda dagiti motorsikloda no kasta a makarugida. Nakaar-ariwawa dagitoy ta saan metten a ‘tay orihinal ti tambutso dagiti luganda. Naka-muffler-da!

Napintas koma ti agsiesta no kasta a leppas-pangngaldaw. Namnamaem a naulimek ti aglawlaw ta adayo bassit ti purokmi iti haywey. Ngem gapu kadagitoy ubbing kada agtutubo a gatel nga agmaneho, mariribuk ti panagsiesta. Wenno panagpanunot koma no ania ti suraten ken diskarte iti biag.

Nagsayaat ketdin ti panangpikarda agingga nga agsaltek ‘diay accelerator ti pamay-anda. Sada pay la iranta a paugsakkaken wenno paguttoten. Makakurikor kadagiti lapayag!

Saan laengen nga iti barangay kada municipal roads ti kastoy. Uray payen iti haywey, pagam-ammuan lattan, adda pumawengweng iti nakapigpigsa. Pikar iti pikar ti pamay-anda. Uray dis-oras iti rabii no maminsan!

Adda sangapagilian a linteg, ammotayo dayta a maiparit ti naariwawa a lugan. Ken kasta metten dagiti ubbing wenno menor de edad nga agmaneho.

Ken iti ilimi, ibuntok payen dita dagiti ordinansa a nangsuporta kadagita a paglintegan. Pagdaksanna laeng, saan a nasayaat ti pannakaipatungpalna.

Kinuna ti maysa a konsehal ti ili, isuda ti agpanday iti linteg a maipatungpal kadagiti kailianda. Maysa ditan ti pannakatiliw dagiti menor de edad nga agmaneho. Ken ti naka-muffler a lugan.

Ngem saandan nga akem ti pannakaipatungpal daytoy. Addan kadagiti pannakabagi ti linteg.

Husto dayta. Ta no trabahoda pay ti agtiliw, dakdakkel nga amang ti dida maakem a pagrebbenganda.

Yanna nga adat, saan a nasayaat, kas nasaon, ti pannakaipatungpal dagitoy a pagimbagan.

Ti mapalpaliiwtayo, aglikaw met dagiti pannakabagi ti linteg no kasta a mawayaanda. Ken no adda agreport kadakuada. Pagdaksanna, awanton dagitoy a pasaway ‘ton dumtengda iti lugar.

Kasano, adda lookout dagiti ubbing ken agtutubo. Sumungsungad pay laeng dagiti otoridad, insiwetdan a mapan aglemmeng. Rummuardanto manen inton nakapanaw dagitoy.

Adda payen dagiti agda-drag racing a makuna.

Ken addadan sumagmamano a disgrasia gapuanan iti kinapataray dagiti drayber ita gapu iti kinasimpa ti dalanenda.

Daytoy koma a pasamak ti kayattayo a maliklikan.

Kadagiti kastoy a parikut, nagdakkel koma ti papel dagiti opisial ti barangay. Isuda ti umuna a makadlaw wenno makaimatang kadagitoy a pasamak. Isuda la koman ti umuna a mangbagbaga kadagiti annak a matiliwanda.

Ngem kasda man la tuleng. Awan man ti aksion nga ar-aramidenda. Baybay-anda lattan a dagiti pannakabagi ti linteg iti makaammo. Ngem no panunoten, isuda koma dagiti umuna nga otoridad a mangipatungpal kadagitoy nga ordinansa.

Ken sumangkadakkel met ti akem dagiti nagannak itoy a banag. Isuda ti ad-adda a makaammo kadagiti annakda. Isuda koma ti umuna a mangiparit kadagitoy iti aramidda. Dida ipalubos a baliwan dagiti annak ti pannakapartuat dagiti lugan nga iggemda.

Ta pagaaayat dagitoy no naariwawa ti tambutso ti luganda. Kasla musika iti panagdengngegda ti makatitileng nga ungor!

Ti nakas-ang pay, no dillawen ida dagiti natataeng a masikoran iti ar-aramidenda, ikatawada laeng. Wenno yad-adda pay ketdi no dadduma!

Nupay kasta, sinanamatayo nga adda solusion dagitoy a parikut. Panagtitinnulong laeng met ti kasapulan. Saan koma met konsintiren dagiti nagannak dagiti annakda.

Ta iti udina, isuda/datayo met laeng a nagannak ti umuna a madaksan ken maldaang no adda bareng ania kadagiti annak!

Wen, kailian, daytoy ti rason no apay a kaykayatko la koman a di nasemento ti kalsadami! Ngem adda ditan! Ad-adu latta met ketdi ti ipaayna a pagimbagan ti pannakasemento dagitoy. Isu a masapul a sanguen daytoy a panaglupos. Ket tapno awan ti disgrasia nga ibungana, nasken unay dayta panagkaykaysa a mangipatungpal no ania ti linteg.