Saan a Mabalin a Paggiddanen a Serbian dagiti Dua nga Amo

MAKALAWASEN ti napalabas ngem saan pay a naawan ti ragsak dagiti mangid-idolo ken ni Manny Pacquiao kalpasan ti pannakapasublina iti kampeonato iti World Boxing Organization Welterweight Division iti maikatlo a gundaway kalpasan a pinarmekna ti sigud a kampeon a ni Jessie Vargas bayat ti panaglabanda sadiay Thomas and Mack Center, Las Vegas, Nevada, USA.

Kabayatan dayta a laban, adu nga opisial ti gobierno iti Pilipinas dagiti napan nagbuya iti laksid dagiti nadagsen a problema iti pagilian nangruna ti adu a nadadael ni Bagyo Lawin iti Amianan a Luzon, ken ti agtultuloy a kriminalidad. Inaklon ni Pacquiao a gimmastos isuna iti $1 million wenno P48 million para kadagiti nasinged kenkuana a napan nagbuya iti labanna. Maysa kadagiti opisial ti gobierno a personal a napan nagbuya iti dayta a laban ket ti hepe ti Philippine National Police a nangaklon nga inlibre ni Pacquiao ket imbestigaren ti Ombudsman gapu iti “graft practice” ta dayta nga inaramidna ket saan a maiparbeng kas opisial ti gobierno.

Nagasat ni Pacquiao gapu kadagiti balligi a nagtengna manipud iti kinapanglaw a nakayanakan ken napuotanna ta babaen iti anus ken rigatna iti boksing ket nagun-odna ti kinabaknang, dayaw ken turay a sagsagrapenna iti agdama. Iti panagballigina iti boksing ken nagduduma a benneg ti panagbiag ket maysa a pagwadan dagiti marigrigat a Pilipino tapno ikagumaanda ti agarapaap, aganus ken saanda a maupay agingga iti magtengda iti balligi.

Ngem kadagiti panatiko a mangid-idolo kenkuana ket nasken nga amirisenda nga iti laksid ti dayaw dagiti Pilipino iti sangalubongan nga impaayna ket adda dagiti galadna a saan a maiparbeng a tuladen. Kalpasan ti panagretiro ni Pacquiao iti boksing idi naabak iti labanda ken ni Floyd Mayweather ken sakbay ti panagkandidatona a senador, impalgakna ti panagretironan iti boxing ring. Ngem kalpasan ti panangabakna a senador, nagsubli manen iti boxing, ken manamnama nga addanto pay dagiti sumaruno a labanda a mabalin a ti masegseggaan a rematch-da ken ni Mayweather. Ania ngata ti gapu a nagsubli manen isuna iti ring? Dayaw? Dakkel a premio?

Iti pakasaritaan iti boksing iti intero a lubong, ni Pacquiao ti umuna ken kakaisuna a senador iti maysa a pagilian a nakagun-od ti kampeonato wenno world title iti boxing. Iti dayta a panangabakna, nakategged manen isuna iti minillion a dolliar gapu iti kinalatakna iti lubong. Ti pinarmekna a ni Vargas ket nagganar iti saan a nababbaba a $3 million iti laksid a saan a nalatak isuna sakbay ti labanda ken ni Pacquiao.

Iti kadagupan dagiti natan-ok a kampeon a boksingero iti lubong ket awanen ti umartap wenno pumada iti balligi a nagteng ni Pacquiao iti nagduduma a benneg ti panagbiag. Manipud iti kinapanglaw, nagbalin a kampeon iti walo a titulo iti boksing iti sangalubongan, nagganar iti minillion a doliar gapu ti pannakirupakna kadagiti boksingero a nakabalubalna. Uray saan a nakangato iti pormal a panagadal idi agtutubo pay gapu ti kinapanglaw, in-inut a nakaturpos iti kolehio idi baknangen gapu iti special learning system. Manipud iti sigud a saadna a sarhento iti reserve force ti Philippine Army, naital-o a lieutenant colonel. Kalpasan ti pannakaabakna a congressman sadiay General Santos City a nakayanakan ken dimmakelanna, immakar sadiay Sarangani a probinsia ni Jinkee nga asawana ket nagbalin a kongresista.

Itan ket maysan a senador, kabayatan a bise gobernador met ni Jinkee nga asawana iti Sarangani. Maysan a Born Again pastor manipud iti sigud a kinadebotona a Katoliko. Malaksid kadagita a pakakumikomanna, maysa isuna a negosiante, player ken head coach pay iti team-na iti Philippine Basketball Association. Nagbalin nga artista iti pelikula ken recording artist iti musika. Ania pay ngata ti kalikagumanna iti biag?

Kalpasan ti panagsenadorna, manamnama nga agtarigagayto pay iti nangatngato a posision iti masakbayan isu a no adda gundawayna ket iparparangarangna ti kinaalibtakna sadiay Senado. Awan ti dakesna ti agarapaap. Ngem kasla saan a maiparbeng dagiti agkokontra a paginteresanna iti panagbiag.

Kas pastor, a mangikaskasaba iti Sao ti Dios ket igiddanna met ti propesion a boksing a mangdangran iti padana a tao ken pagpipinnustaan dagiti sugador, ken ti agbalin a politiko a mangilunglungalong iti linteg a maikontra iti bilin ti Dios kas ti pannakaisubli ti dusa a patay.

Agpili koma ni Pacquiao no ania ti napatpateg kenkuana – ti agboksing wenno agsenador, ti agbalin a pastor ti pammati wenno agurnong iti aglaplapusanan a kinabaknang, bileg ken pammadayaw? Saritaen ti Nasantuan a Surat, iti Mateo 6:24 ken Lucas 16:13 nga awan ti tao wenno adipen a makapagserbi iti dua nga amo ta guraenna ti maysa ket ayatenna ti sabali wenno agserbi a sipupudno ken sipapasnek iti maysa ket umsienna met ti sabali, ket saanna a mapaggiddan a pagserbian ti Dios ken ti sanikua. (Eden A. Alviar)