Saan a mapili ti best friend

Salaysay ni Arlene Manzano-Ellorin

Salaysay ni Arlene Manzano-Ellorin

IDI addaak iti maudi a tukad ti kolehio, adda kaeskuelaak iti maysa a subject nga ik-ikayan dagiti dadduma a kaeskuelaanmi. Saan kano nga agsusurot dagiti sasawenna. Dida maawatan. “Addan sa kunkuna ti ulona,” “adda samsamattitna”, ipalaisda a kuna. Idi damo, ik-ikayak met ta abusta lalaki, kasla saan pay a mapagtalkan dagiti garawna. “Sumayet” koma no maysa a babai. Natarabit ken saan a masleg uray asino ti kasangsangona.

“Apay a nakaunipormeka iti pang-fourth year, ania kadi ti yearmon?” nasaludsodko iti naminsan. Maisupadi ngamin, kabagis, ti uniform dagiti graduating education students kadagiti lower years.

“Fourth year met laeng a, kas kadakayo. ‘Su ngarud nga agkakaeskuelaantayo,” insungbatna.

Ngem agsidsiddaaw ti unegmi ta kasano koma nga agkakabatchkami ket idimi laeng a makaeskuelaan? Uray dagiti instructorsmi ket dida ammo no sadino ti naggapgapuanna a ‘lubong’ ta kasla metten luag ti daga a timpuar.

Idi mangrugikamin nga ag-observe kadagiti assigned classesmi, naikkan met isuna iti schedule. Napukaw ngarud a namimpinsan ti duaduami. Ngem awan pay makabulan, sabali manen ti kolor ti unipormena, kapadan dagiti lower years! Idi damagenmi no ania ti napasamak, kinunana a pagpupudotan dagiti instructorsmi ta saanda kayat a paggraduaren. Idi imbestigarak, saan pay met gayam a kualipikado nga agpraktis iti kinamaestro ta adu pay ti dina nalpas a subjects.

Diak napuotan, siak metten ti kanayonna a kapatpatang. Diak met makilga ta kababain a supladaak ta awan met ti ipakpakitana a madi. Manipud met idin, kanayonen a kumuykuyog kaniak. Awan met ti mabalinak ta nasayaat met a kadua. Isuna laeng ta no kakuyogko, ikayandak metten dagiti dati a kadkaduak. Naam-ammok ngarud isuna a naimbag. Uray kunkunada a narigat a masurotan dagiti sawsawenna, an-anusak lattan a denggen.

Masimsimronak no dadduma ta uray agdadata nga awan kaes-eskan ti sawsawenna, sigaganas latta nga agpatang. Dumngeg met kadagiti balakadko.

Ngem no adda masaok a pakasairan ti riknana, agmulengleng lattan.

“Best pren, kasano ti agmem-ber iti college paper? Padasek man met ti sumrek?” nakunana iti naminsan.

Nasdaawak ta diak impagarup nga agessem met gayam iti panagsuratan. Ngem uray no kasta, binayabayko ta ammok a siak laeng ti pagpasiganna.

Saan koma a maala a writer idi, ngem gapu iti reggetna, impaspasa rakmi nga inkappeng. Naregget nga agpayso ket sabali ti staminana nga agsurat.

Ngem makaupay ta ti met laeng gayam essemna ti adda a puonanna.

Idi gandatenna ti sumrek manen iti university papermi a Tandem, inupaykon. “Ag-concentrateka laengen iti Rabbi, pren. Narigat ti adu unay a pakakumikoman.” Kaasin’ Apo, dimngeg met.

Aktibo pay met kadagiti nadumaduma nga organisasion. Uray saanda unay nga ikankano, tumulong latta. Saan nga agimulmula iti sakit ti nakem. Awan bibiangna no adu ti manglalais iti liklikudanna. Bilibak ta natibker ken aglaplapusanan iti self-confidence.

Idi damo, mapilpilitannak laeng a makigayyem kenkuana ngem idi agbayagen, kaykayatko payen a kadua ta ammok nga awan ti panaginkukuna kadagiti garawna. Idi madlaw dagiti gagayyemko a nasayaat ti panaggayyemmi, in-inutda met laeng nga immasideg.

Kalpasan ti graduesionmi, saankon a nakita pay ni ‘Best Pren’. Nagtransfer kanon ket awan metten ti damagko maipapan kenkuana. Kasla timmubo nga uong idi ket kasla met laeng uong a nagrupsa lattan a di nadnadlawan. Agpapan ita, maysa pay laeng a burburtia ti kinatao ni ‘Best Pren’ko.

Don’t judge a book by its cover, dayta ti nasursurok iti panagkaduami. “Adu dagiti gagayyem a simmangpet, saan nga aminda ket magustuam ti isarangda a rupa ngem denggem ti ibaga ti kaunggam ket isurona ti pudno a kinatao ti kasangsangom.” Dayta ti kanayonko a mangngeg kadagiti natataengan ngem siak. Wen, saan a mapili ti maysa a gayyem. Adda bukod a wagas ti nakaparsuaan tapno isu a mismo ti mangpili iti para kenka.

Ay, kabagis! Ditay’ ammo no ania ti mapaspasamak kadagiti sumarsaruno nga aldaw, ti laeng Dios a Namarsua ti makaibaga.#