Saan nga agpaputok iti paltog ken illegal firecrackers iti panangsangbay iti Baro a Tawen

BANTAY, Ilocos Sur — Saan nga agpaputok iti paltog ken agusar kadagiti napigsa ken illegal firecrackers tapno maliklikan dagiti aksidente, ket dagiti matiliwan nga aglabsing ket agsungbatda iti linteg.

Dayta ti nayetnag a ballaag ken direktiba ti liderato ti Philippine National Police nga ipakat dagiti kameng ti Ilocos Sur Police Office iti panangidaulo ni Colonel Emmanuel Reyes, Provincial Director, ken kadagiti nagduduma a City / Municipal Police Stations iti probinsia.

Naamuan ti nainget a panangipatungpal ti PNP iti direktiba kabayatan ti panawen ti Paskua agingga iti Baro a Tawen para ti panag-checkpoint, panagpatrulia, police visibility tapno malapdan ti pannakapasamak dagiti krimen ken pannakalabsing ti linteg nangruna iti panagaramat iti paltog ken firecrackers.

Maibalakad kadagiti amin nga umili iti panagliklikda iti indescrimate firing iti paltog ken saanda a panagpaputok kadagiti dadakkel ken maiparparit a firecrackers para ti nakappia a panangsarabo iti Baro a Tawen. Maibalakad pay a nasaysayaat nga agusarda laengen kadagiti alternatibo a pamataudan iti ariwawa kas ti torotot, sound system, banurbor ti motor ken dadduma pay a wagas a saan a makadisgrasia.

Mayawis pay kadagiti umili a nasaysayaat a makikaysada kadagiti community fireworks display no adda kadagiti lugarda ta nataltalged, ket no agusarda kadagiti legal a paputok ket mapanda kadagiti lugar nga adayo kadagiti tattao ken pagtaengan. 

Nagpalagip met ti Department of Health a lisian dagiti umili ti agusar kadagiti firecrackers tapno malisian ti pannakadangranda a mabalin a pakapukolan wenno pakabulsekanda. Impakdaarda pay ti kinapeggad ti asuk dagiti firecrackers kadagiti addaan iti respiratory diseases nangruna dagiti addaan iti angkit a riingen wenno pakaruenna ti sakitda.

Nag-warning met ti Bureau of Fire Protection kadagiti umili iti panagannad iti panawen ti Paskua ken panangpasangbay iti Baro a Tawen nangruna iti panagusar kadagiti nagduduma a firecrackers ken fireworks display ta no mabaybay-anda ket mabalin a pagtaudan iti uram.

Naammuan a dagiti polis ken firemen ket nakaalertoda ita a panawen agingga inton malpas ti Baro a Tawen. Uray dagiti ospital ket nakasaganadanto met a mangtaming kadagiti mabiktima iti panangpasangbay iti Baro a Tawen.

Maipalagip nga iti Ilocos Sur a kadagiti naglabas a panangpasangbay iti Baro a Tawen ket addan dagiti nabiktima iti indiscrimate firing ti paltog iti Caoayan, addan dagiti nabiktima kadagiti firecrackers kadagiti nagduduma a lugar iti probinsia, ken addan napuoran iti sentro ti Vigan City.

Maibalbalakad nga iti panagpasina iti tawen ket rambakan laeng iti natalinaay a wagas tapno malisian dagiti trahedia tapno naragsak ken nabunga ti Baro a Tawen. ●