Sarita ni Mark Anthony Castro
(Maikadua a paset)
“Apay ket a saanen?” ni Virgie ti nagtimek sanak pinarimriman. Kinugtarak ti sakana iti sirok ti lamisaan.
“Ay, wen, di la mabalin a yaramidannak iti komposision nga itedko ken ni Mr. Ytehan?” kinuna ni Virgie.
“Kaano ti pannakasapulmo?” dinamag ni Joselito.
“Inton bigat. Namnamaek kadi?”
“Bay-am ta yaramidanka.”
“Agyamanak. Namnamaem nga agsubalitakto iti masakbayan. Umayakto agbuong iti pinggan no agkasarkayo,” ket tinaldiapannak.
Kinusilapak.
Pagam-ammuan, napataliawkami iti ruangan gapu iti arimbangaw dagiti sumungad. Da Carlos. Dinagdagusko a sinimpa ti panagtugawko.
“Hi, girls!” kinuna ni Carlos. Anian a nagdakkel ti naggidiatanda ken ni Joselito, nakunak iti nakemko idi agabayda a dua.
“Ammoyo, kasangayko inton Sabado,” kinuna ni Carlos. “Addanto saganak. Awisenkayo, dikayto maaw-awan, a? Nangruna kenka, Ofie,” kinitanak. “No dika dumar-ay, saanto a kumpleto a naragsakak iti panagkasangayko.”
“Ay, mabalin a saankami a dumar-ay,” inunaannak ni Virgie a simmungbat. “Namnamaem, addakaminto no kasangaymo.”
“Umaykanto met, pari,” tinapik ni Carlos ti abaga ni Joselito.
“Okey,” insungbat ni Joselito sanak kinita. Ngem kasla awan ti nangegko.
SABADO. Alas siete pay laeng ngem nakasukatakon. Pusiposak a pusipos iti sanguanan ti sarming. Diak kayat nga adda pamilawan ni Carlos kaniak. Alas otso idi umaynak sukonen ti van. Adda metten da Virgie ken Mila. Naarimbangawkami iti uneg ti lugan.
Pimmalasio ti balay da Carlos. Iti mismo a nalawa a paraanganda ti nakaikabilan dagiti lamisaan a nairanta a paggiinuman. Sabali laeng ti salonan a pakaipatpatayaban ti nagarampang a tokar. Sumagmamano ti agkuykuyegyeg iti salonan idi sumrekkami iti inaladan.
Sinabatnakami ni Carlos iti ruangan. Nagkulipagpag ti pusok a nakaimatang iti kinataerna iti daytoy a sardam.
“Happy birthday,” inkablaawko idinto nga inyawatko ti regalok.
“Agyamanak,” insungbatna ket nariknak ti nairut a panangpetpetna iti imak. Immuli ti bara ti dakulapna agingga iti pusok.
Intulnognakami agingga iti naintar a lamisaan. Pinilimi ti lamisaan iti asideg ti salonan.
Inyam-ammonakami ni Carlos kadagiti pagayamna. Adun ti nagawangan a botelia ti serbesa iti rabaw ti lamisaanda. Nalabbagan ti rupada ken naarimbangawdan nga agiinnestoria.
“Sika gayam ni Ofel,” kinuna ti agnagan Marty. “We know you. Sika ti arkos ti bibig ni Carlos, he he he!”
“Saan nga agul-ulbod ti brodmi. Agpayso a….” saan a naituloy ni Albert ti sawenna pay ta tinugkik ni Carlos ti agongna.
“Dimo dengdenggen ida ta nadanumandan a kasla tukak,” umis-isem a kinuna ni Carlos.
Sineniasan ni Carlos ti maysa a serbidor ket nagpaala iti mainum ken baso.
“Feel at home,” kinuna ni Carlos ngem siak ti tinaldiapanna. “No mabisinkayo, mapankayo lattan mangala iti kanenyo,” intudona iti abagatanen a paset ti solar a nakaikabilan dagiti nataratar a nakaluban a sida.
Nagpadispensar ta adda pay sabali a simmangpet a sangailina.
Inwarasko ti panagkitak iti aglawlaw. Nakitak ni Joselito iti ummong dagiti dadduma a kaklaseanmi. Nagpayapay idi makitanakami. Medio nasugpet nga isem ti insungbatko iti payapayna.
Naipatayab ti nakaranting a tokar. Nabiit a napunno ti salonan. Kas pay nagsardeng ti panagpitik ti darikmat iti asitgannak ni Carlos.
“Di la mabalin?”
Nagpatngakami iti salas. Apay a kasla panaltagan ti pusok? Kastoy ngata ti marikna ti seknan ni ayat?
“Ammom, napintaska unay ita a rabii,” kinuna ni Carlos bayat ti panangkumpasna iti tokar. Pinerrengnak iti napigket.
“Agang-angawka,” kinunak idinto ta limmabbasitak.
“Saannak kadi a patien?”
“Saan la ketdi,” nakunak. Ngem nagtalukatik iti kaunggan ti barukongko ti naisangsangayan a ragsak iti panangpadayawna kaniak.
(Maigibusto)