Saan nga Agulbod dagiti Mata

Sarita ni Mark Anthony Castro

(Maudi a paset)

Kellaat, nagsardeng ti tokar. Nagpatnga ni Andrew, kabarkada ni Carlos.

Hep, dikayo pumanaw iti salonan. Maymayat ti panagtibnok dagiti agpitpitik a puso no nalamuyot ti sonata. Tokar, maestro!”

Ingngato ni Andrew ti tangan ti imana sana kinerman ni Carlos. Ingngato met ni Carlos ti makannawan a tangan ti imana.

Inawidnak ni Carlos. Diak maawatan ti bagik no apay a diak agtukiad. Nagdennes ti barukongmi. Kaslaak la maitaytayab iti ayuyang dagiti bituen ken ulep ken bulan.

Ammom, nakallalagip daytoy a kasangayko,” kinuna ni Carlos.

A-Apay?” inamadko.

Ngamin ta addaka,” nariknak ti nabara a sang-aw ni Carlos iti puon ti lapayagko. Diak ammo ngem nagkarayam ti naisalsalumina a rikna a nanglapunos iti kinataok.

Nalpas ti tokar. Intulnognak ni Carlos iti tugawko.

Insukom ti Bataanen?” sinidolnak ni Mila. “Nakaapalkayo iti panagsalayo.”

Addan ipalpalagidna,” nakunak.

Saanmon a palusposan,” inkidday ni Virgie.

Iti sumuno a sonata, inasitgannak ni Joselito ket kiniddawna ti panagsalami.

Ladingitek, Joselito,” kinunak. “Nabannogak.”

Saanen a nagtimek pay ni Joselito. Saan a nailaksid kaniak ti pannakapaay a naimaldit iti rupana. Ngem kinutik laeng ti abagak. Ania kadi ti kaes-eskanna kaniak?

Madamdama, ad-addan nga immarimbangaw iti salonan aglalo idi kasla nadanumanen a tokak dagiti lallaki. Agsasarunon dagiti naparagsit a tokar a maipatayab. Siak latta ti masansan nga isala ni Carlos. Nalaing nga agsala ni Carlos. Nadegdegan ti panagraemko kenkuana.

Kalpasan ti panaggibus ti tokar, kinuna ni Carlos. “Dika kadi pudoten?”

Dagaangenak ngarud,” insungbatko.

Inta ‘diay ruar agpariir. Adda ibagak kenka.”

Agtibtibbayo ti barukongko bayat ti panagturongmi iti sirok ti narukbos a mangga nga adda iti likudan ti balayda. Nagtugawkami iti nasemento a pagtugawan a naikali iti aglawlaw ti puon ti mangga.

Inyangadko ti rupak iti mangliwengliweng a tangatang. Rumimatrimat dagiti bituen. Immangesak iti nauneg idi immaplaw ti makapasalibukak a pul-oy ti rabii. Ngem saan a pumanaw ti karkarna a rikna iti barukongko.

Ammom kadi no ania ti ibagak kenka?” pinerrengnak ni Carlos iti napaut.

Ania kadi?” imbabak ti matak ta kasla mapurarak iti perrengna, kasla sumarsarut agingga iti kararuak.

Ay-ayatenka, Ofel.”

Nagdumogak idinto a gumaniteben ti barukongko. Nariknak laengen ti panagkarayam ti dakulap ni Carlos ket pinetpetanna ti imak iti nairut. Ginuyodnak ket naipideg ti barukongko iti barukongna. Nariknak ti agat-serbesa a sang-awna a nagkarayam iti pingpingko.

Saan, Carlos,” kinunak. “Adda makakita kadata ditoy.”

Ngem kasla awan ti nangngeg ni Carlos. Inarakupnak ket nariknak lattan ti apuy a naimaldit iti bibigko. Nairut. Umir-irut agingga iti urayak la naangsan. Kellaat nga induronko.

Pangngaasim, Carlos.”

Ow, saanka koma a simmurot ditoy no awan ti panagayatmo kaniak.”

Nagburek ti darak. Iti apagdarikmat, napukawen ti panagraemko kenkuana. Saanen a nataer.

Timmakderak. “Panagkitak ket disenteka a tao, Carlos,” nakunak. “Pangngaasim, dimo koma dadaelen ti panagraemko kenka.”

Sakbay a makasungbat, dinardarasko ti nagpusipos nga agturong iti salonan. Nagsubliak iti pagsalaan. Nakitak ni Joselito iti ummong dagiti dadduma a kaklaseanmi. Inasitgak. Rimmaniag ti rupana iti pannakakitana kaniak.

Nabayagen a birbirokenka, Ofel,” kinunana.

Rimmuarak ta agsakit ti ulok,” inyulbodko. “Agawidakon, diak maibturanen. Di la mabalin nga itulnognak?”

Agpakadata pay ken ni Carlos.”

Tapno di dumlaw ni Joselito, nagturongkami iti yan ni Carlos. Indiayana ti panangitulnogna kaniak.

Saanen, kababain kadagiti sangailim,” nakunak. “Uray ta adda ni Joselito a manguyog kaniak.

Nagbaybaykami a rimmuar iti balay da Carlos. Diakon timmaliaw nupay ammok a sipsiputannakami ni Carlos. Ketdi, nariknak ti kinatalgedko iti denna ni Joselito.#