Saan nga Agulbod dagiti Mata

Sarita ni Mark Anthony Castro

(Umuna a paset)

 

NAGTITINNALDIAPKAMI kada Mila ken Virgie idi lumabas da Carlos ken dua a kinakuyogna iti yanmi nga agtugtugaw iti sirok ti narukbos nga akasia.

“Hay, talaga a nagguapo,” insennaay ni Mila apaman a nakalikudda. “Saan kadi, Ofel?” sinidolnak.

“Masapul kadi pay ti ikakanunongko?” immisemak iti narabuy. Manipud idi nakaklaseanmi ni Carlos iti Essay and Biography, isun ti nakaiturongan dagiti parimrimmi a babbai. Naggapu ni Carlos iti maysa a nalatak nga unibersidad iti Manila. No ania man ti gapuna a naidakdak iti kolehio iti kabesera ti probinsia, saanmi nga ammo. Ngem ketdi, dakkel ti panagyamanmi ta ditoyen ti nangituloyan ni Carlos iti panagadalna. Iti dayta a taktakder ken gunggunay, nagasat ti babai a makatagikua iti ayatna.

“Mariknak ket agirayen ti pusom kenkuana,” kinuna ni Virgie. “Kasanon ni Joselito?”

Limmabbagaak. “Saantayo man nga isagsagpaw dayta a Joselito iti saritaan. Minsanton no agayatak kenkuana. Purawton ti wak.”

“Ngata?” inkidday ni Mila. “Adda pagsasaotayo: No asino ti magasangan, isu ti nasilian.”

“Saandak a patien?”

“Ngem ania ti pamilawam ken ni Joselito?” kinuna ni Virgie. “Masirib. Isu ti editor ti pagiwarnaktayo. Saan a nataer a kas ken ni Carlos, ngem iti biangko laeng, nasayaat a lalaki ni Joselito. Iti dayta a kinasiribna…”

“Ania koma?” insungbatko. “Basta diak kayat. Tulnek.”

“Hus, kasta la ti saom,” kinuna ni Mila.

Naglibbiak. Ngem diakon sinungbatan dagiti sutilda. No agkalinteganak, ad-adda laeng a sutilendak. Idi agangay, naumada met laeng.

Dandanin makatawen nga agrayo ni Joselito kaniak. Napinget nupay awan pay ti namnama nga imparipiripko kenkuana. Pudno a masirib ni Joselito. Ngem no maikkat dayta a kinasirib, awanen ti saguday a maipagpannakkelna. Narapis. Agan-anteohos pay ket kunam la no duduogan.

No sarungkarannak iti pagkaseraak, ad-adda a dagiti natan-ok a mamasirib, dagiti naindaklan a kapampanunotan ken aramid ti saritaenna, bambanag nga awan a pulos ti essemko a dumngeg. Apay a dina dayawen ti kinapintas ti badok nga ad-adda a mangpaminar iti kasla natubtubay a pammagik wenno ti kabarbaro a pannakaurnos ti buokko, wenno dagiti kabaruanan a tsismis iti Facebook?

No idiligko ni Joselito, pagakikit laeng ni Carlos.

ALDAW TI LUNES, Mierkoles ken Biernes ti panagkaklasemi kada Carlos. Kadagita nga aldaw, ipakatko ti amin a kabaelak a mangpapintas iti bagik. Tallo laeng a tugaw ti kaadayok ken ni Carlos. Ad-adu dagiti kanito nga itaktakawko ti panangkitak kenkuana ngem ti panagdengngegko iti sasawen ti propesora.

Iti naminsan, nagsabat dagiti matami ket inisemannak. Nagkulibagtong ti pusok idinto ta dinardarasko nga imbaw-ing dagiti matak.

Kalpasan ti klase, nagturongkami kada Mila ken Virgie iti kantina. Bakantemi ngamin ti sumaruno a klase. Nagbilinkami iti saggaysakami a pagpalamiis.

“Nalpasmon ti assignment nga inted ni Mr. Cortez iti Math?” dinamagko ken ni Mila.

“Wen,” insungbatna. “Kinopiak ken ni Joselito.”

Saanak a nagtimek ngem inalistuak nga inukrad ti kuaderno ni Mila ket sinakarkon dagiti problema.

“Kunak man no dimo kasapulan ni Joselito?” insutil ni Mila.

“Baam ta ilibrek ti meriendam no madamdama,” kinunak ketdi.

“Ayabak ni Joselito, isu ti nagrigat a nangsungbat, rumbeng laeng a masupapakan,” impasngat ni Virgie.

“Saan man a ti la lablabidenyo ta dinto ket sabali ti masakarko,” nakunak.

Kalkalpasko la unay a nagsakar idi umasideg ni Joselito. Dinagdagusko a kinupin ti kuaderno ni Mila sako inlimed nga inyawat kenkuana.

“Mabalin ti makiragup kadakayo?” kinuna ni Joselito. Ngem siak ketdin ti pinerrengna. Dinagdagusko nga impababa ti gayadan ti pangipeten a paldak. Ngem kaskasdi latta a di nalingdan ti pamudawen a luppok. Iti suronko, binay-ak lattan a nakaduyayat ti luppok. So what no makitana ti luppok, dina met maala? nakunak iti nakemko.

(Adda tuloyna)