Footer

Saan pay a nagabay

Itay nabiit, inrekomenda ti Ombudsman a maisaklang iti graft da dati a Department of Agriculture Secretary Luis Lorenzo ken Undersecretary Jocelyn “Jocjoc” Bolante gapu iti mapapati a pannakainbolbarda iti P728 milion nga anomalia iti abono.

Akusado da Lorenzo ken Bolante iti malbersasion iti publiko a pondo gapu iti panagsalungasingda iti RA 3079 wenno Anti-Graft and Corrupt Practices Act.

Karaman pay nga akusado dagiti regional directors ti D.A. gapu iti panangsurotda iti pammilin ni Bolante a mangpabor kadagiti napili a suppliers iti abono ken dagiti agilinlinteg ken lokal nga opisial a nagbalin a resipiente iti pondo.

Nupay sinarurongan ti Malakaniang ti rekomendasion ti Ombudsman a maisaklang iti graft da Lorenzo ken Bolante, adda panagduaduana iti daytoy nga inaramid ti Ombudsman.

Umuna, asideg unay ni Ombudsman Merceditas Gutierrez ken ni dati a First Gentleman Jose Miguel Arroyo a kinaklasean iti Ateneo Law School ket adda suspetsa a naipatugaw ni Gutierrez a mangipangulo iti Ombudsman tapno salaknibanna dagitoy kadagiti maisaklang a kaso mainaig kadagiti anomalia a mapapati a nakaisawsawanda.

Madakamat ditoy ti ZTE-NBN a proyekto gapu iti mapapati a pannakamalamalda iti panagpasuksok a nagbalin a dakkel a kontrobersia a nanggunggon iti gobierno ni nag-Pres. Arroyo.

Da laeng dati a Comelec Chairman Ruben Abalos ken dati a Neda Chief Romulo Neri dagiti naisaklang a mausig idinto a nalawlawagan ti nagan dagiti agassawa nga Arroyo.

Iti kaso ti fertilizer scam, no patien ti report ti Field Investigation office ti Ombudsman, awan ti ebidensia a mangitudo nga adda pannakainaig ni dati a Presidente Arroyo iti fertilizer scam iti baet dagiti alegasion a naaramat dagiti pondo iti panagkampaniana a para presidente idi 2004.

Di ngarud nakakaskasdaaw nga adu dagiti agduadua iti panangipaulog ti Ombudsman iti rekomendasionna a maisaklang iti graft da Lorenzo ken Bolante, a maysa laeng daytoy a palabas tapno agparang a saan a tinugawan ti Ombudsman dagitoy a complaint ket iti agangay, maikupinto manen agingga iti malipatan dagiti umili ken agsukat ti liderato ti pagilian. Apay nga ita laeng a paggunayenna daytoy tatta nagsukaten ti administrasion?

Ad-adda a nakapapati a napilitan laeng ti Ombudsman a nagkuti iti imbatad ti Malakaniang a maisaklang ti dadaulo daytoy iti impeachment gapu iti mapaliiw a panangtugawna kadagiti naipila a complaint maikontra iti dati nga amona iti Malakaniang.

Makunami met: Saan pay a nagabay nga ipakita ni Ombudsman Gutierrez a saan a pudno dagiti alegasion a salsalaknibanna dagiti Arroyo kasta met a lintegenna ti alegasion nga awan durina a mangipakat iti naan-anay a hustisia nangruna kadagitoy nga akusasion maikontra kadagiti nabileg a tattao a dagiti umili ti kadakkelan a biktima agsipud ti naipaidam kadakuada dagiti pondo a rumbeng koma a maipaay para iti pagimbagan ti kaadduan.#