Saan sa a napintas ti planetas ni Pres. PNoy ita a 2015

Salaysay ni Danny Antalan

Kayatda patakiasen ni Noynoy Aquino kas Presidente ti Pilipinas.
Itay laeng nabiit, linak-amna ti kababaan a trust rating manipud idi nagtugaw idiay Malacaniang.

Ti kangrunaan a rason iti daytoy in-inut a panaglumen ti talek dagiti umili ket ti napasamak a panakapapatay ti 44 a kameng ti Special Action Forces idiay Mamasapano, Maguindanao idi Enero 25 2015.

Ti kontrobersial a pasamak ti narikna dagiti umili gapu iti asi kadagiti namasaker a pulis ken gapu iti atap a pannakabaybay-a kadakuada iti panawen a kasapulan ti reinforcement. Pinabasol ni Pnoy ni SAF director general Getulio Napenas, Jr. a nagulbod kano kenkuana maipanggep iti operasion. Ngem saan a nagustuan dagiti umili ti panangipulagidna iti uging iti rupa ti opisial ti pulis. Ad-adu latta ti mamati a dakkel ti natugawan ni sigud a director general Alan Purisima iti balligi a panakapapatay ken Marwan ngem panakamasaker met ti 44 a SAF.

Isu nga ita, dumakdakkel ti awag a tumapuak isuna iti Malacaniang.

Ania daytoyen a mapaspasamak iti mangidadaulo kadatayo. Itay napalabas a tawen, saan a napintas ti planetas ni Bise Presidente Jejomar Binay gapu kadagiti nagkaadu nga isyo ti panagkunniber a naipuruak kaniana.

Ita met a tawen, madi met ti planetas sa ni Presidente Pnoy ta isu met itan ti maisasaang iti napudot a danum gapu iti Mamasapano massacre.

Isu nga ita, dumakdakkel ti awag iti panaglusulosnan. Karaman pay ditan a mangaw-awag dagiti ulitegna a saan a napagustuan iti administrasionna.

Isu nga ita, agarado metten ti trust rating. Makatitileng dagiti protesta a maar-aramid kadagiti kalsada. Makatitileng dagiti banat kaniana iti radio ken telebision.

Maysa laeng ti rumbengna a pagyamanan no apay a di unay makaarangkada ti Oust Pnoy. Dayta ket gapu ta adu ti saan pay laeng a mangayat ken ni VP Binay a mangsukat kenkuana. Ta no la koma ni Poe, Duterte ken Roxas, amangan no naaramiden ti Peoples Power 4.

Ngem siempre, madina kayat ti bumaba iti puesto—a kas met laeng ti panagkedked dagiti napalpalabas a nagbalin a presidente a pumanaw iti Malacaniang: da Ferdinand Marcos, Cory Aquino, Joseph Estrada ken Gloria Macapagal Arroyo.

Kinapudnona, talaga met a saan a napintas a timing a sukatan pay kadagitoy a gundaway ti Presidente. Dandanin ti eleksion. Ket no mapasamak ti riribuk, ad-adda laeng a mariribuk ti amin a situasion iti pagilian. Kakaasinto manen dagiti umili. Kakaisuna a napintas metten ti taray ti ekonomia ti pagilian. Kakaisuna a nakabangontayon iti didigra nga indateng ni Yolanda. Kakaisuna a pinasiaren ti pagiliantayo ni Pope Francis.

Ngem panagkunak ketdi, no daytoy Mamasapano ti mangpalusulos ken ni Pnoy, saanto a mapasamak dayta. Ta panagkunak, uray pay bimmassit ti nagtalek iti presidente, ngem mayoria latta ti kayatda nga ileppas ni Pnoy ti administrasionna agingga 2016.

Dayta a— no awanen ti sumaruno pay a ginggined iti administrasionna.

Ta no ar-arigen, Enero pay laeng, napadasan san ti Pilipinas ti posible a mapadasanna iti makatawen. Idi Enero, napasamaken ti bagyo, ginggined, gubat ken nadagsen nga isyo ti pulitika. Nupay daytoy gubat idiay Mamasapano ti kangrunaan a nangisiis kenkuana.

Ket bareng awanen ti dakkel nga isyo a maipiltak kaniana.

Ken kasla pay ketdin napinpintas nga urayen laengen ti Mayo 2016 tapno saan nga agbalin nga isyo-politikal dagiti mapaspasamak iti administrasionna a ti kangrunaan a maap-apektaran met ket dagiti umili iti Pilipinas.#