Footer

Saanen a ‘butaw’ ti Metropolitan Vigan Heritage Development Authority iti ititipon ti San Ildefonso

VIGAN CITY – Saanen a Metro Vigan Coordinating Council no di Metropolitan Vigan Heritage Development Authority ti nagan daytoy konseho a binuangay dagiti pito a local chief executives idi 2008.

Kasta met nga inwaragawag ni Mayor Eva Marie S. Medina a saanton a butaw ti mapa ti MVHDA ta impeksan ni San Ildefonso Mayor Mark Purisima ti tarigagayna a maikappon ti ilina iti nasao a konseho.

Agbalinton a maysa a siudad ken pito nga ili ti mangbukel iti MVHDA a pakaibilangan ti Vigan City, Caoayan, Bantay, Santa, San Vicente, Sta. Catalina, Sto. Domingo ken San Ildefonso.

Kanaig daytoy, kinuna ni Medina nga agmanipesto ti pito a miembro ti dati nga MVCC tapno mairaman ti San Ildefonso.

“Napimpintaston ti mapana (MVHDA) ta saanton a butaw,” kinuna ni Medina idinto nga innayonna a “tatta agkakaduakamin (San Ildefonso), “makitan a talaga nga adda panagmaymaysa iti daydi Metro Vigan Coordinating Council”.

Idi nabuangay ti Metro Vigan Coordinating Council idi 2008, saan a timmipon ti San Ildefonso nga idauluan idi ni Mayor (bokal itan) Christian Purisima gapu ta “adu ti pakakumikomanda” nga agtuturay ket saanda a nakadar-ay kadagiti strategic planning workshops” para pannakabukel ti nasao a konseho.

Idi masaludsod no apay a nairaman ti Santa idinto nga adda iti maikadua a distrito ti probinsia, inlawlawag ni Medina a saan a geographical divisions ti kinitada no di “shared boundaries, shared history, ken shared interests”.

“No adda shared boundaries, adda ti pakainaigantayo iti developmentda ken adda ti pakainaiganda iti developmentayo,” kinuna ni Medina sana impasingked nga “agtitinnulongkami iti resources tapno naparpardas ti development iti daytoy nga area.”

Kinuna pay ni Medina a madadaanda nga umawat iti local government unit a kayatna ti tumipon iti MVHDA agsipud ta “no man is an island.”

“Saan a mabalin nga agtaktakderka lattan a dika makikoordinar iti kaparanget nga ili, masapul a makikoordinarka tapno napigpigsa ti bosestayo,” kinuna ti mayora.

Naipilan iti Kamara ti gakat ni Cong. Ronald Singson a mangted iti personalidad iti MVHDA.

Sagudayen ti memorandum of agreement a pinirmaan dagiti pito a chief executives idi Septiembre 8, 2008, agserbi ti nabuangay nga MVCC a kas maysa a body tapno mapasayaat ti kapabilidad iti pannakaited iti basic services kasta metten a makapagdinnanggay dagiti kameng para iti nalaklaka a pannakasolbar dagiti problema babaen ti koordinasion.

Dagiti sumaganad dagiti areas of cooperation: trade and industry, governance, infractrusture, environment, peace and order, public safety, tourism, social services ken agriculture. #