Saaylen nait, Oli nait… Paskuayo Apo! (Maudi a paset)

Linabsanmi ngarud ti kantina. Tinurongmi ti balay da Anti Victa. Damag itay malem a simmangpet ni Manong Tibker, ti anakda a soldado ken ni Angkel Rene.

Nupay agkukulot ti bosesmi, impasaksakmin ti Jingle Bells. Maay-ayatan dagiti agassawa a nangbuybuya iti panagkantami. Madamada nga agluto iti kankanen iti laud ti balayda. Madama met ti panagbuya iti telebision ni Manong Tibker nga anakda. Nalawag a makita ta nakalukat ti salasda. Klasmeyt idi ni Ninong Rilo iti haiskul.

“Maysa man pay,” inrekues ni Angkel Rene.

Inrayokmi ti O, Holy Night. Permi a pakumpasmi.

“Nagbaliw met gayamen ti linia ti kanta,’ inyisem ni Angkel Rene idi malpaskami. “Ngem ti napateg, naparagsakdakami nga agassawa. Makapalagipkayo…” ket sinaggaysanakami a tinapik. “Kasla makitkitak ti panagubingko kadakayo.”

Nangisupot ni Anti Victa iti nalutoda a bibingka.

Inyawatannakami met ni Angkel Rene iti singkuenta pisos.

Napalaus a yamanmi.

“’Guraykayo!” nayawag idi rummuarkamin iti inaladan.

Ni Manong Tibker! Nakatakder daytoy iti ridawda. Ania ketdin a panagbagbagina! Sabagay, maysa a soldado.

“Apay, Ser?” inamad ni Pidong idinto nga inasitganmi.

“Alaenyo daytoy,” inyawatna ti nakasiksikkil a sangagasut.

“Tenkiu, Ser! Tenkiu!” anian a yamanmi. Napasaludoak pay a simmursurotan dagiti kakaduak.

Inisemannakami laeng. “Agannadkayo iti dalanyo…” kinunana.

Intuloymi ti nagpalaud. Napnon ti plastik a pagipananmi iti napaskuami a kankanen. Nagdagsen metten ti bulsak a napno iti sensilio.

Agalas diesen idi makagtengkami iti ili. Agsasallupang dagiti padami a makipaskua. Awan payen ti arindenggan iti aglawlaw gapu kadagiti paputok.

Kasla kitkitaekon ti magatangko a hamburger wenno donut…

Napasanapsapak.

Dikamin a nagkaroling. Dimi kayat ti mabugkawan a kas kadagiti dadduma a kabaddungalanmi. Kasano a di kasta, agkukulot la ngaruden ti bosesda a kas kadakami, manggundawayda pay laeng met. No innemda koma iti grupo, pagkatloenda; sagdudua ti mapan agkanta iti balay. Di kad’ mamitlo a paskuaenda! Agtitipondanto met laeng kalpasanna. Agkikitada iti kanto.

Nagdiretsokami iti simbaan. Karugrugi ti misa. Gapu ta napuseken iti uneg, intakdermi lattan iti sirok dagiti gmelina iti sango ti simbaan. Mangngeg agingga ditoy ti boses ni Father Teody ta adda naimuntar nga ispiker.

“Agiinnayattayo koma, Kakabsat,” insermon ni Father  Teody, “ta ti ayat, paksiatenna ti amin a kita ti panagbuteng… ta namunganay daytoy iti Dios. Isu ngarud nga insagutna ti bugbugtong nga Anakna gapu iti ayatna kadatayo. Nagbalin a kas kadatayo babaen ti Espiritu Santo…”

Timmangadak iti ngato. Apo, agyamanak ‘ta ayatmo. Sika koma ti mangtarabay iti sibubukel a pamiliami. Ikkam iti naan-anay a salun-at da nanang ken tatang, naitanamitimko.

“…Agpipinnakawantayo, Kakabsat. Saantayo a mabalin a kunaen nga ay-ayatentayo ti Dios no guraentay’ met ti kaarrubatayo. Tulongantayo ketdi dagiti awanan. Ditay’ aglablabes…”

Di la ngata napasugkian dagiti adda aramidna? Puera de los buenos ngem adu ti di makaammo iti ruangan ti simbaan no kasta nga adda kiddawenda.

“Selebrarantay’ koma ‘toy pannakayanak ti Mannubbot babaen ti simple a wagas. Awan kadagiti agkakagarbo a pagan-anay ken agkakabaknang a taraon ti pudno nga anag ti Paskua. Ayat, dayta ti pudpudno a kaipapanan ‘toy naindaklan nga aldaw…”

Agalas onsen idi malpas ti misa. Nagiinnunakami nga agbabarkada a nakisabit kadagiti traysikelan a kalugaranmi. Awanen iti isipko dagiti arapaapko a taraon.

Ngem gapu ta agpauneg ti purokmi, kapilitan a dimsaagkami iti kanto iti nagbedngan ti barangaymi ken ti Brgy. Sta. Cruz.

Impagpagnami bassit ta hustonto ti sumrekanmi nga agturong iti purokmi.

Nalabsanmi ti kantina da  Angkel Usting ken Anti Binit. Silulukatda pay laeng. Adu dagiti agiinum. Nakarasrasawen dagiti ngiwatda.

“Ubbing, umasidegkay’ man ditoy,” nayawag kadakami.

Ni Anti Binit!

Nagkikinnitakami nga agbabarkada. Masmasdaawkami.

“Apay, Anti?” inamad ni Pidong.

“Kantaandakami man met. Kayatko a sawen, agkarolingkayo…” kinunana. “Awan man laeng ti immay nagkaroling.”

Imutkayo met ngamin, nangngegko nga indayamudom ni Ambang.

Kinidagko. “Mangngegnaka,” kinunak.

Ngem iti unegko, tiptipdek ti ellekko. Kasla agpakpakaasida a yegmi kadakuada ti Paskua. Ita laeng a makapuotak iti kasta. Nalawag ngarud a linabsan met dagiti padami nga agkaroling ta ammodan ti kinaimut ken kinakuspagda.

Nupay makaaw-awidenkamin, inrayokmi lattan ti nagkanta.

O, kam, ol ye peytpul! Ol trayam so pan…

Pinasarunsonanmi pay idi makitami a maragsakanda la unay nga agassawa. Nakipagrayrayok metten dagiti agiinum.

Anian a ragsakmi idi yawat dagiti agassawa ti paskuami.

Saggagaysakami a sopdrink ken adda pay hamburger ken donut. Sabali laeng ti nabukel a limapulo a pisos!

“Ramananyo ‘toy insangpet ni manangyo a Dhiv,” kinuna ni Anti Binit a ti manangen ni Kilong nga agbasbasa idiay siudad ti Tuguegarao ti kayatna a sawen. “’Maykayto manen, a, no Baro a Tawen?” Nakasamsam-it ti isemna.

Ne, ta ammona met gayam ti umisem.

“Wen, Anti,” inkorusmi.

Iti panpannagnami iti tambak dagiti piskaria a mangitunda kadakami kadagiti balbalaymi, natangadko ti tangatang. Naiburrais dagiti bituen. Makidindinnaegda iti gilap dagiti paputok. Inarakupnak ti napalaus a ragsak idi malagipko da Anti Binit. Isu kadi ti sinilnagan ‘diay bituen a nagtaud idiay Belen?

Meri Krismas, Apo Hesus, naitanamitimko. Agyamanak ta pinatgam ti dawatko itoy a pannakaitaom. Ngem Sika ti kapatgan a sagut kaniak itoy a Paskua.

Ket nupay sibubussogak pay laeng iti impapaskua ni Anti Binit kadakami, nagsaraaw latta ti tianko idi malagipko ti tininubongmi ken ni tatang. Ken ammok, kas kadagiti nagkauna a Paskua iti biagko, agur-uray itan ni ninong idiay balay nga iggemna ti sagutna a tinubong.  Kasta met ti kalluto a kaskaron ni Anti Saling.#