Sabali a kita ti rebolusion

NUPAY mabalin nga ipetteng a nainkalintegan ti panagrebelde maikontra iti diktador wenno rinuker a pangulo, makapadakes iti demokrasia no sobra ti people power. Dua a dati a Presidente ti nangipeksa iti daytoy a kapanunotan idi nalagip ti Edsa I itay Pebrero.

Saan a mabalin a di italtalek daytoy a kapanunotan ta naggapu kada nag-Presidente Corazon Aquino (pimmusay ni dati a Pres. Cory idi August 1, 2009. – Ed) ken Fidel Ramos a nagbalin a sentro a pigura iti “rebolusion dagiti tattao” idi 1986 ken 2001.

Dakamatentayo ditoy a naisayangkat ti dua a People Power, ti umuna, maikontra ken ni daydi Pres. Ferdinand E. Marcos, ken ti maikadua, ni napadisi a Presidente Joseph Estrada.

Idi Pebrero 1986, nagrebelde da Ramos, kaduana ni Juan Ponce Enrile, ken sumagmamano nga opisial ti militar a sumuporta kadakuada. Tinawagan ni Arsobispo ti Manila Jaime Cardinal Sin dagiti tattao a mangsalaknib kada Ramos ken Enrile. Nagtungpal dagiti tattao ken nagdadarisonda iti Edsa. Ditoy a naipasngay ti Edsa I a nagtungpal iti ipapanaw ni Marcos iti pagilian ken pannakaipatugaw ti maysa nga agtagtagibalay, ni Corazon Aquino, kas Presidente.

Idi Enero 2001, sabali manen a “rebolusion dagiti umili” ti napasamak. Bunga daytoy ti saan a panangipalubos dagiti senador-hues ti pannakalukat ti maikadua nga enbelop a mapapati a naglaon kadagiti dokumento ti bangko ni napadisi a Pres. Joseph Estrada iti nagan a Jose Velarde.

Sangsangkamaysa, sangsangkarikna dagiti umili a nagdadarison iti Edsa shrine ket inyikkisda ti yuulog ni Estrada. Kalpasan ti panangibabawi ti militar ken PNP iti suportada ken ni Estrada ken ii panaglusulos iti nasurok a kagudua a kameng ti Gabinete, kapilitan a pimmanaw ni Estrada iti Malakaniang. Simmukat a nagtugaw ti bise presidente, ni Gloria Macapagal-Arroyo, kas kangatuan nga opisial ti gobierno.

Maibilang a natalna ken saan a nadamsak a panangtippuog iti nakatugaw a pangulo dagiti dua a rebolusion dagiti umili. No ar-arigen, awan ti naiparukpok a dara, banag a rinaem ti internasional a komunidad. Ditoy laeng pagilian ti nakapasamakan ti kastoy a rebolusion.

Ngem timmalali ti sabali a kita ti rebolusion dagiti umili.

Daytoy a panagpanggep a panangrubbuot iti turay nga insayangkat dagiti mangisaksakit ken suporter ni Estrada a kaadduanna ti makunkuna nga urban poor, saan a  kas dagiti immuna a dua a sakupda dagiti nadumaduma a klase ken sektor, nabaknang ken napanglaw, dagiti agiray iti makannigid wenno makannawan.

(Adda tuloyna)