Sabali manen a dormitorio, natakawan

VIGAN CITY – Sabali manen a dormitorio iti university belt a sakup ti Barangay Tamag ditoy siudad ti natakawan idi malem ti Septiembre 3.

Idi agarup 3:00 ti malem ti nadakamat a petsa, nakaawat ti police station ditoy iti report manipud iti maysa a Nancy Atendido y Cardenas, 50, naasawaan, caretaker, ken residente iti Barangay Balaleng Centro, Bantay, Ilocos Sur, a naserrek dagiti kuarto ti Jay-Rem Dormitory a nakapukawan dagiti laptop, kuarta ken selpon dagiti agkaskasera.

Nainaganan dagiti biktima a da Bishqoakama Nimesh, 23, awanan asawa; Nirajan Khamal, 21, awanan asawa; Kapair Sailesh, 22, awanan asawa; ken ni Chaudahary Shrawan, 23, awanan asawa, agpapadada a Nepalese ken estudiante iti University of Northern Philippines, Vigan City, Ilocos Sur.

Natakaw ti AXUS 16 inches Laptop ni Bishqoakama Nimesh nga agbalor iti P26,000.00; ti Lenovo Laptop ni Nirajan Khamal nga agbalor iti P26,000.00, IPAD color white nga agbalor iti P10,000.00, P5,000.00 ken 3,000 Nepalese currency; ti Sony 14 inches Touch Screen Laptop ni Kapair Sailesh, cellphones (Falre 2X Cherry and Nokia) nga agbalor iti P6,500.00, ken P1,700.00 a cash; ti Dell Vostro Laptop ni Chaudahary Shrawan nga agbalor iti P28,000.00, maysa a cellphone, 50 Singaporean currency, P2,500.00 Philippine currency, ken 1,500.00 Nepalese currency a naikabil iti nangisit a bag.

Kas maibatay iti panagimbestiga dagiti polis, pinanawan dagiti biktima dagiti kuartoda ken ti main door nga aluminum glass a nakakandado idi agarup 9:00 ti bigat ngem idi nagsubli dagiti estudiante kalpasan ti alas dose ti malem, nasukalanda laengen a nakalukat ti main door ken ti ridaw dagiti kuartoda ken awanen dagiti gamit ken kuartada.

Nakastrek dagiti di nabigbig a mannanakaw iti dormitorio babaen ti panangporsarda iti main door sada dinadael ti knob ti ridaw dagiti kuarto.

Iti pannakaisurat daytoy, awan pay ti natiliw a suspek iti nasao a panagtakaw.

Daytoy ti maikadua a beses nga adda naireport a natakawan a dormitorio iti las-ud ti dua a bulan.

Idi Agosto 18, naserrek ti Room 8 ti Soberano Dormitory a kukua ni Nelson Soberano y Tugade, 51, naasawaan, negosiante, ket natakaw dagiti laptop dagiti tallo a babbai nga estudiante met laeng iti UNP.

Nainaganan dagiti biktima a da Kresalene Abad Makey, 18, residente iti Barangay Matibuey, San Emilio, Ilocos Sur; Magdalena Corpuz y Pati, 19, residente iti Barangay Tiagan, San Emilio, Ilocos Sur; ken ni Joy Paulo y Balantic, 20, residente iti Gregorion del Pilar, Ilocos Sur, estudianteda amin iti UNP.

Natakaw ti Gateway net book ni Abad nga agbalor iti P13,000.00; ti net book ACER nga agbalor iti P15,000.00 a kukua ni Corpuz idinto a laptop ACER nga agbalor iti P18,000.00 ken ni Paulo.

Segun iti maysa a boarder iti nasao a dormitorio a maysa a Margie Biangdan y Venancio, 18, estudiante iti UNP ken residente iti Caoayan,Sugpon, maysa a lalaki a nakaaruat iti blue stripe t-shirt a nagbaklay iti bag pack ti nakitana a rimmuar iti kuarto.

Idagdagadag ti kapolisan ti pannakaipuesto ti CCTV camera kadagiti pagkaseraan ditoy tapno materred dagiti adda panggepna nga agtakaw kadagitoy a pasdek.#