Sabali manen nga ubing, nalmes iti pakias

BANTAY, Ilocos Sur – Sabali manen nga ubing ti nalmes iti irrigation canal sadiay Sitio Baoay, Barangay Paing idi malem ti Mayo 22 bayat ti pannakitegged ti inana babaen ti raep.

Naitaray ni Aaron Riberal y Hernando, 9, residente iti Barangay San Sebastian, San Vicente iti Metro Vigan Cooperative Hospital ngem pimmusay bayat ti pannakatamingna.

Segun iti report, napan nakipagraep ni Aida Riberal y Hernando, 30, iti nadakamat a barangay babaen ti awis ti kabsatna ket inkuyogna ti anakna a ni Aaron.

Mapapati a nakiay-ayam ti ubing kadagiti kapatadanna bayat ti pannakipagraep ti inana.

Kalpasan ti raep, bayat ti panaginana ni Aida iti balay ti iipagna, nadlawna nga awan ti anakna ket idi nagdamag kadagiti kinaay-ayam daytoy, imbagada a dida nadlaw ti panagpukaw ti ubing.

Nagpatulong ni Aida kadagiti mannalon ket sinawarda ti ubing agingga a nasarakanda daytoy iti uneg ti kanal.#