Sabali nga iskema ti panagbayad iti loan, kiniddaw dagiti mannalon ti Vigan

VIGAN CITY – Kiniddaw ti mayor ditoy siudad iti maysa a kooperatiba a maipaayan iti sabali nga iskema ti panagbayad dagiti mannalon ditoy iti utangda.

Kinuna ni Mayor Eva Marie S. Medina a dinawat dagiti mannalon kenkuana a maikkanda koma iti sabali a payment scheme iti utangda ket daytoy ti kiniddawna ken ni Divina Quemi, manager ti Nueva Segovia Consortium of Cooperatives.

Kinuna ni Medina a saan a kas iti aglaklako iti sarisari store ti mannalon nga inaldaw nga adda paglakuanna ken ganarna agsipud ta manipud iti panagmulaan, umabot iti uppat agingga iti lima a bulan santo makaapit a pangalaanna iti pagbayadna iti utangna.

“Indawatda a no mabalin, no bumulodda ita, agbayaddanto kalpasan ti panagapitda,” kinuna ni Medina, sana innayon a kiniddawna ken ni Quemi a maipaayan dagiti mannalon ken mangngalap iti sabali nga iskema iti panag-bayad iti utangda iti kooperatiba.

Segun iti daytoy a loan package nga addaan met laeng iti 6% nga interest per annum, agbayad laeng dagiti mannalon iti 2% para iti uppat a bulan ken 1% para iti insurance kas seguridad iti loan.

“No madisgrasia ti nag-loan, awanen ti bayadan wenno liability ti pamiliana, ti insurance ti mangbayad iti utangna,” kinuna ni Medina.”

Segun iti mayora, adda 3% a service charge ngem maipan ti 1.5% laeng iti kooperatiba ken mabati a maideposito ti 1.5% para met laeng iti proyekto dagiti mannalon ken mangngalap kas iti lakbay-aral dagitoy ken continuing education.

Kinuna ni Medina nga adda pay mailunglungalong a P11 a bayadan ti mannalon para saranay ngem opsional laeng daytoy no kayat ti mannalon ti agmiembro.

“Ti pagsayaatan daytoy, saan laeng a ti borrower ti ma-insure, adda pay maawat a benepisio ti immediate a pamiliana,” kinuna ni Medina.

Innayon ti mayora nga adda pay opsion ti loan package a masursuruan dagiti mannalon wenno mangngalap a mangidulin iti mapastrekda wenno maganarda.#