Sabali pay a baliena, nasarakan a natay iti igid ti baybay

LAOAG CITY – Sabali manen a baliena ti nasarakan dagiti lumugar a natay a naisadsad iti igid ti baybay ti Sitio Silaw, Barangay Navotas ditoy siudad, idi Hulio 21.

Segun ken ni Arthur Valente, Fishery Regulatory Coordinator ti Provincial Agriculture Office, daytoy ti maikadua a baliena a naisadsad iti igid ti baybay ti Ilocos Norte iti las-ud ti uppat nga aldaw.

Nasarakan iti Sitio Silaw, Barangay Navotas ditoy siudad a natay a naisadsad ti baliena, maysa a giant sperm whale, nga agdagsen iti agarup 80 tonelada ken agatiddog iti 22.3 metro ken agakaba iti 3.5 metro.

Maibilang nga endangered specie ti giant sperm whale.

Kinuna ni Valente a mangrugin nga agrupsa ti giant sperm whale idi masarakan dagiti lumugar ti Barangay Navotas a naisadsad iti igid ti baybay.

Mapattapatta a natayen ti baliena iti nasurok a makalawasen ket maysa nga impatayna dagiti sugatna iti bagina.

Kinuna ni Valente a kitkitaenda met ti posibilidad a natay ti baliena gapu iti epekto ti panagbaliw ti klima.

Nupay kasta, kinuna ti opisial a saandan nga ipakatan iti necropsy ti baliena tapno maammuan ti pudpudno a gapu ti nakatayanna agsipud ta agrupsan.

Idi Hulio 18, nasarakan met dagiti lumugar iti Barangay Susugaen, Pasuquin, Ilocos Norte ti maysa a giant sperm whale a naisadsad iti igid ti baybay.

Mangrugi metten nga agrupsa ti naisadsad a baliena a mapattapatta nga agdagsen iti 250 kilos ken agatiddog iti 10 kadapan idi masarakan.

Nangala da Valente iti sample manipud iti nadumaduma a paset ti bagi ti baliente tapno maipaamiris iti laboratorio tapno maammuan ti nagapu iti ipapatayna sakbay a naikali iti nadakamat a coastal barangay.

Kinuna ni Valente a makalinto ti baliena kalpasan ti makatawen tapno mapreserba dagiti tultulangna.

Ti baliena a nasarakan a natay sadiay Sitio Silaw, Barangay Navotas ti maikanem a naisadsad iti probinsia ti Ilocos Norte manipud pay idi Enero daytoy a tawen.

Liman kadagitoy ti nasarakan a natay idinto a naipasubli iti kabaybayan ti maysa.#