Sabali pay a dormitorio, natakawan

VIGAN CITY – Natakawan ti maysa a dormitorio iti Barangay Tamag a mapattapatta a naisayangkat idi malem ti Agosto 18 bayat ti kaawan dagiti agkaskasera nga estudiante iti maysa nga unibersidad ditoy siudad.

Naireport a naserrek ti Room 8 ti Soberano Dormitory a kukua ni Nelson Soberano y Tugade, 51, naasawaan, negosiante, ket natakaw dagiti laptop dagiti tallo a babbai nga estudiante iti University of Northern Philippines a masarakan met laeng iti nadakamat a barangay.

Nainaganan dagiti biktima a da Kresalene Abad Makey, 18, residente iti Barangay Matibuey, San Emilio, Ilocos Sur; Magdalena Corpuz y Pati, 19, residente iti Barangay Tiagan, San Emilio, Ilocos Sur; ken ni Joy Paulo y Balantic, 20, residente iti Gregorion del Pilar, Ilocos Sur, estudianteda amin iti UNP.

Iti panagimbestiga dagiti polis, idi agarup ala una ti malem ti nadakamat a petsa, pinanawan ni Jhuna Marie Acosta y Cayabyab, 17, estudiante met laeng iti UNP, kakaseraan dagiti biktima, a saan a nakaserra ti kuartoda.

Naduktalan ti panagtakaw idi agarup 2:40.

Natakaw ti Gateway net book ni Abad nga agbalor iti P13,000.00; ti net book ACER nga agbalor iti P15,000.00 a kukua ni Corpuz idinto a laptop ACER nga agbalor iti P18,000.00 ken ni Paulo.

Segun iti maysa a boarder iti nasao a dormitorio a nainagan a maysa a Margie Biangdan y Venancio, 18, estudiante iti UNP ken residente iti Caoayan,Sugpon, nakitana ti maysa a lalaki a nakaaruat iti blue stripe t-shirt a nagbaklay iti bag pack ti rimmuar iti kuarto.

Saan a nadakamat iti report no adda CCTV camera a nayinstolar iti nasao a dormitorio.
Indagadag ti kapolisan ti pannakaipuesto iti CCTV camera kadagiti pagkaseraan ditoy gapu iti kaadda dagiti mairepreport a pannakaserrek dagiti dormitorio.#