Sabali pay a drug personality, pinapatay nagkalubbon iti motorsiklo

VIGAN CITY – Adda agdakdakiwas a death squad a mangipakpakni kadagiti personalidad nga adda pannakainbolbarda iti droga ditoy siudad ken iti Bantay?

Sabali manen a drug personality ti napapatay idi aldaw ti Oktubre 20, 2010 iti Gomez Street, Barangay IV ditoy Vigan babaen dagiti armado a tattao a nagkalubbon iti motorsiklo ken nagaramat iti cal. 45.

Segun iti report, nakatugaw ni Antonio Bilgera y Sabado, 34, baro, iti amianan a paset ti maysa a sarisari store iti nadakamat a kalsada idi agarup 11:40 ti nasao nga aldaw, idi inasitgan dagiti suspek ket pinaltoganda iti sumagmamano a daras.

Dagus a natay ni Bilgera. Naglibas a nagpaabagatan dagiti suspek a naglugan iti motorsiklo.

Nangisayangkat dagiti polis iti dragnet operation iti posible a rimmuaran dagiti suspek ngem mapapati a nakalusoten dagitoy.

Nakarekobre dagiti inbestigador iti lima a basyo a naggapu iti cal. 45 iti crime scene.

Adda dagiti nakainbolbaran ni Bilgera a kaso ti droga iti napalabas.

Ni Bilgera ti maikapat a drug personality a napapatay ditoy Vigan ken Bantay babaen dagiti armado a tattao a nagkalubbon iti motorsiklo ken nakaaramatan iti cal. 45.

Idi Septiembre 15 daytoy a tawen, pinaltogan ti dua a lalaki a nagkalubbon iti motorsiklo ni Rowena Pipo y Ramos, naasawaan, natibo ti Nueva Ecija iti Zone III, Bantay, Ilocos Sur.

Natayen ni Pipo idi maidanon iti Metro Vigan Cooperative Hospital.

Saan pay a nabigbig dagiti pimmatay kenkuana.

Segun iti polis ti Bantay, adda naipila a kaso ti droga maikontra iti biktima ken nakabalud ti asawana gapu iti maiparparit a droga.

Pinaltogan met ti di nabigbig a suspek ni Dominic Flandez y Sebastian kalpasan ti igagatangna iti taraon iti maysa a restaurant iti De Los Reyes Street idi rabii ti Agosto 15. Cal. 45 met ti naaramat iti pammaltog.

Segun iti polis, adda naipila a tallo a kaso ti panagikut iti droga maikontra ken ni
Flandez.

Idi malem ti Agosto 10, pinaltogan ti dua a lalaki a riding in tandem ni Roger Cariaga y Aquino, 45, iti Gen. Luna Street, Barangay I ditoy siudad ti Vigan.

Naideklara a natayen ni Cariaga idi maidanon iti maysa nga ospital iti Bantay, Ilocos Sur gapu iti sugatna iti ulo ken tengngedna a gapuanan ti cal. 45.

Nairaman a nasugatan ni Violeta Camacho, 31, live-in partner ti biktima, ken ti 6 ti tawenna nga anakda.

Mapapati a nainbolbar ti biktima iti illegal a panaglakuan iti droga iti kallabes.

Di pay nabigbig dagiti pimmaltog ken ni Cariaga.

Idi Agosto 5, nangitanggaya ni Gov. Luis “Chavit” Singson iti P100,000 a gunggona kadagiti polis a makatiliw kadagiti aglaklako iti droga kas paset ti kampania ti gobierno probinsial maikontra iti maiparparit a droga iti probinsia.#

Enhanced by Zemanta