Sabali pay a drug pusher, pinalab-ogan dagiti polis

CERVANTES, Ilocos Sur – Sabali pay a drug pusher ti natinnag iti palab-og ti kapolisan ditoy idi malem ti Disiembre 14 kas paset ti agtultuloy a nainget a kampania ti Police Provincial Office maikontra iti panaglakuan iti droga iti probinsia.

Saan a nakalusot iti drug operation nga impakat ti kapolisan ditoy maikontra ken ni Ramir Ramirez y Galino, 31, naasawaan, laborer, ken residente iti Barangay Rosario, Cervantes, Ilocos Sur, a nakakumpiskaanda iti droga ken drug paraphernalia ken tallo a bala.

Karaman kadagiti nakumpiska dagiti polis ti maysa a heat sealed transparent plastic sachet a nagkarga iti mapapati a shabu; 19 nga empty transparent plastic sachet; 13 heat sealed empty plastic sachet; 3 a tig-P500.00 a naaramat a bust money; 2 peso bill; 3 a bala para Cal. .45; maysa a Euro Jumper 150 motorcycle; maysa a Nokia cell phone model 105; maysa a black wallet; maysa a professional teacher PRC ID; driver license , voter’s ID; xerox official receipt ken xerox certificate of registration iti nagan ni Edgardo Dumlao Jr; maysa nga snowbear candy; maysa a kaha ti posporo; ken maysa a and heat sealed plastic sachet a nagkarga iti mapapati a shabu a naala iti nagpammarang a buyer kalpasan ti transaksion.

Kalpasan ti pannakaipakat kenkuana ti medico-legal examination, naipan ti suspek iti crime laboratory iti Camp Elpidio Quirino, Bulag, Bantay, Ilocos Sur agraman kadagiti nakumpiska nga ebidensia para iti pannakaamirisda.

Kabayatanna, napilaanen iti kaso a panaglabsing iti RA 9165 ken RA 10591 ti lider ti maysa a grupo nga agop-opera iti Ilocos Sur iti opisina ni Associate Provincial Prosecutor Arceli Perla Y. Rebollido-Refuerzo, idi Disiembre 13.

Sakbayna, idi agarup 1:00 ti malem ti nadakamat a petsa, napakatan ni Puzon iti buy bust operation babaen dagiti nagtipon nga operatiba ti Tagudin police station ken ti PDEA RO1, Team Bravo a nagresulta iti pannakakumpiska iti ikutna ti mapapati a shabu, drug paraphernalia, buy-bust money ken balbala.#