Footer

Sabali pay a mangngalap, mapukpukaw

CAMP ELPIDIO QUIRINO, BANTAY, Ilocos Sur – Nangipaulog ni PNP Provincial Director Police Senior Supt. Virgilio Fabros iti pammilin  iti kapolisan ti probinsia iti panangiwayatda iti agtultuloy a search operations para iti pannakabirok ti maysa a mapukpukaw a mangngalap manipud iti Bolinao, Pangasinan.

Naiturong ti pammilin kadagiti amin a hepe ti polis nga akinsakup kadagiti coastal barangays iti probinsia.

Nakaawat ti provincial police office ditoy iti flash alarm manipud iti Bolinao, Pangasinan a mapukpukaw ni Marianito de la Cruz, 30, naasawaan, residente iti Concordia, Bolinao, Pangasinan sipud pay nagpataaw iti rabii ti Hunio 21 nga isasangbay ni Bagyo Frank.

Imbes a magna iti kabisayaan ni  Bagyo Frank, nagbaliw ti direksionna ket limmasat iti Metro Manila sa nagpaamianan ken rimmuar iti Dagupan City.

Duapulo ket innem a mangngalap manipud iti Agoo, La Union ti naitawtaw iti baybay kalpasan a pinattog dagiti dadakkel a dalluyon ti bangkada.

Naitakdang ti tallo iti La Union met laeng idinto a naisadsad ti 11 kadakuada iti Pilar, Sta. Cruz, Ilocos Sur ken ti 12 a sabali pay a grupo iti San Vicente, Ilocos Sur (Basaen ti sabali a damag – Ed.)

Nakaawiden dagiti mangngalap iti ilida.

Segun ken ni Catherine, asawa ni Marianito, nagpataaw daytoy iti alas nuebe ti rabii ti Hunio 21.

Ekspektaren ni Catherine nga aggawid ni lakayna iti met laeng kabigatanna ngem awanen ti nakaammuanda no anian ti napagtengna.#