Sabali pay a menor de edad a nagtakaw iti motorsiklo, naaresto

VIGAN CITY – Nasulisog a nangitaray iti motorsiklo gapu ta nakatunnal ti tulbek iti ignition, daytoy ti palawag ti maysa a menor de edad iti polis kalpasan a natiliw a sakayna ti motorsiklo a naireport a natakaw ditoy siudad.

Narekobre dagiti polis iti ikut ni Kennedy Almanza y Morales, 16, baro, ken residente iti Barangay Ayusan Norte, ditoy siudad ti Kawasaki Aura motorcyle a naireport iti Vigan City police station a natakaw idi rabii ti Abril 22.

Segun ken ni Carlos Reyes y Pichay, 42, naasawaan, ken residente iti Barangay III, Vigan City, akinkukua iti Kawasaki Aura motorcycle, imparkingna ti luganna iti agarup 8:00 ti rabii ti Abril 22 iti sikigan ti balayda ngem nalipatanna nga inikkat ti tulbek iti key hole.

Naduktalan laengen ni Reyes nga awanen ti motorsiklona idi agarup 10:00 ti dayta met laeng a petsa.

Nagturong dagiti polis ti Vigan nga indauluan ni Police Inspector Glenn Dulay babaen ti direkta a superbision ni Police Chief Inspector Ernesto Navarro, Jr. OIC, iti McDonald food chain iti Barangay 1 ditoy siudad tapno beripikarenda ti impormasion a naawatda manipud iti maysa a di nagpabigbig a residente a nakitana ti motorsiklo iti dayaen a paset ti nasao a panganan.

Positibo ti impormasion a nagtungpal iti pannakatiliw ni Almanza.

Kitkitaen ti polis no agmaymaysa ti suspek a nangtakaw iti motorsiklo wenno adda dagiti kakaduana.#