Sabali pay a motorsiklo, natakaw

VIGAN CITY – Sabali manen a motorsiklo ti naireport a mapukpukaw ditoy siudad idi agtapus ti bulan ti Marso.

Inreport dagiti agassawa a Jayson Pinto y Magno, 33, ken ti asawana a ni Emerlita, 37, agnaed iti Barangay San Pedro Sur, Vigan City, iti police station ditoy siudad, a saanda a masapulan ti motorsikloda a Honda Wave nga imparkingda iti Encarnacion Street, Barangay V, idi agarup 5:10 ti malem ti Marso 31.

Nangipatulod ti police station ditoy iti flash alarm kadagiti kabangibangda nga ili para iti pannakasapul ti mapukpukaw a motorsiklo.

Sumagmamano a motorsiklo ti naireport a natakaw iti nakaiparkingda iti napalabas a bulan ditoy siudad.#