Sabali pay a nangabak a barangay kapitan, pinapatay ti armado a tattao a riding in tandem

MAGSINGAL, Ilocos Sur – Awan pay makalawas kalpasan ti pannakapapatay ti  nabutosan a barangay captain ti Napo, Sto. Domingo, sabali pay a nabutosan a barangay captain ti ginudas dagiti armado a tattao a nagkalubbon iti motorsiklo iti Barangay San Vicente ditoy nga ili iti bigat ti Nobiembre 11.

Napaltogan a puon ti ipapatayna ni Barangay Captain elect ti Resurreccion, San Juan, Ilocos Sur Denmark Bueno, 38, iti asideg ti St. Williams Institute iti Barangay San Vicente ditoy nga ili.

Kinuna ni Dr. Ronald Tobias, doktor ti Magsingal District Hospital, managsaggaysa laengen ti panaganges ni Bueno idi maidanon iti ospital ket pimmusayen kalpasan laeng ti sumagmamano a minuto.

Segun ken ni Police Chief Inspector Arsenio Ramos, hepe ti polis ditoy, a kaitultulod ni Bueno ti anakna iti Saint Williams Institute ket ibueltana koman ti luganna nga L300 tapno aggawiden idi immasideg ti maysa a motorsiklo, dimsaag ti triggerman ket pinaputokanna ti biktima iti sumagmamano a daras.

Nagsagrap ni Bueno kadagiti sugat iti nadumaduma a paset ti bagina a tallo kadagitoy ti patal: ti tamana iti abaga, iti bakrang ken iti tianna, segun ken ni Tobias.

Nakarekobre dagiti inbestigador iti nakapasamakan ti pammapatay iti pito a basio manipud iti cal. 45.

Limmugan ti suspek iti agur-uray a motorsiklo ket naglibasda iti saan nga ammo a direksion.

Kinuna ni Ramos a nasipsiputanen sakbayna ni Bueno ket sinurotda daytoy agingga iti pagadalan a nangisayangkatanda iti pammaltog.

Iti panagpalutpot dagiti polis, naammuanda nga immar-arubayanen dagiti suspek sakbay ti pammapatay  ngem saan nga inreport dagiti guardia ti pagadalan agsipud ta dida ekspetaren nga adda gandatda ken ni Bueno.

Segun iti di nainaganan a guardia, atiddog ti buok ti triggerman, nakadiaket iti nangisit ken nakamaong.

Kinuna ti hepe nga ipakitana kadagiti saksi dagiti retrato dagiti addaan kasona a nakapila iti provincial headquarters para iti pannakabigbig dagiti suspek.

Ni Bueno ti maikadua a kabutbutos a barangay captain a napapatay iti uneg ti makalawas laeng.

Idi pasado alas 6 ti bigat ti Nobiembre 5, napapatay ni Napo barangay captain elect Benito Tolentino, Jr. bayat ti panagdaliasat ti minanehona a motorsiklo iti national highway a sakup ti Barangay Baconero, kasakayna ti asawana ken ti 4-ti-tawenna nga anakna.

Nagsagrap ti biktima iti sugat iti ulo a nagtaud iti cal. 45. Saan a naan-ano ti asawa ken anakna malaksid iti garumiad ken kammuolda.

Napilaan iti kaso a murder ni Jessly Tugadi, residente iti Tayum, Abra, ken mapapati a maysa a gun for hire mainaig iti daytoy a pammapatay.

Ni Tugadi ti kangrunaan a suspek iti pannakapapatay ni Cyril Gomez, Singaporean national, iti uneg ti maysa a hardware store iti Vigan City.

Kabayatanna, nakasuan ti maysa a naabak a kandidato para barangay captain gapu iti panangpaltogna iti nabutosan a barangay kagawad iti Barangay Basug, Santa, Ilocos Sur.

Napilaan iti kaso ni Cesar Saraos, kandidato para barangay captain iti kalkalpas a barangay election ngem naabak gapu iti panangpaltogna ken ni Rogelio Aranas Molina, 47, naasawaan, nangabak a barangay kagawad   iti nasao a barangay idi malem ti Nobiembre 4.

Iti inbestigasion ti polis, agtugtugaw ni Molina idi inatake ni Cesar Saraos, kaduana ti kabsatna a ni Julius a mapapati a nakaiggem iti butcher’s knife. Timmaray ni Molina ngem pinaltogan ni Cesar a nakatamaan ti kannigid a saka ti biktima.

Mapapati a pinabasol ti suspek ti biktima a nakagapu iti pannakaabakna iti eleksion.

Saan a narekobre ti armas.#