Sabali pay a Singson immentra iti politika

CANDON CITY –  Sabali pay a Singson ti immentra iti politika babaen ti panagipilana ti kandidaturana para mayor ditoy siudad iti babaen ti Liberal Party-Bileg Party.

Impila ni Dr. Ericson Singson ti sertipiko ti kandidaturana ken ni Comelec election officer Atty. Fidel Gines idi agarup 9:30 ti bigat ti Oktubre 23.

Saanen nga agkandidato ni Mayor Allen Singson iti nasao a puesto agsipud ta maturposnan ti tallo a nagsasaganad a terminona.

Agpailayon met ni Vice Mayor Alfonso Singson iti puestona iti babaen met laeng ti LP-Bileg Party.

Kadua ni Singson dagiti kandidato nga agtaray iti tiketna a pakairamanan da incumbent city councilors Kristel Singson, Nestor Itchon, George Valdez, Rhodana Abrero, Aristeo Valdez, Engr. Florendo Mangasar, Angel Balagot ken Charina Bona ken dagiti baro nga agkandidato a pakaibilangan ni Palacapac Barangay Captain David Wagayen ken ni Aileen Acal.

Nakikappeng metten ni Konsehal Aris Valdez iti LB-Bileg. Nagkandidato ni Valdez idi 2010 a kas independent candidate. (Danny Antalan)