Sabali pay a drug personality nanabtuog iti search operation

VIGAN CITY – Nakaiskor manen ti kapolisan iti kampaniana maikontra iti droga kalpasan a nanabtuog ti sabali pay a drug personality iti insayangkatda a search operation iti balay daytoy sadiay Barangay Tamag, ditoy siudad idi bigat ti Disiembre 7.

Nakalista iti drug watch list ti kapolisan ti Vigan ni Zosimo Sotelo, 59, naasawaan, ken residente iti Barangay Tamag, Vigan City ken naareston iti kallabes mainaig met laeng iti droga.

Nakakumpiska dagiti police elements a pakaibilangan ti Vigan City Police Station, PDEA ISSET 1, PAIDSTOG Ilocos Sur PPO ken PIB, Ilocos Sur iti ikut ni Sotelo iti maysa a pedaso ti 2×2 plastic sachet ken 2 pedaso a heat sealed plastic sachet a nagkarga iti mapapati a shabu ken maysa a nakalukat a plastic sachet a nagkarga iti mapapati a shabu.

Sinaksian dagiti barangay officials, pannakabagi ti Department of Justice ken kamkameng ti media ti pannakadukomento dagiti nasamsam manipud kadagiti suspek.

Naipatuloden dagiti nakumpiska nga items iti Crime Laboratory Office para iti pannakaamirisda idinto a maipakatan iti drug test dagiti natiliw a suspek.

Immun-una ngem daytoy, idi malem ti Disiembre 4, inapput dagiti nagtitipon nga elemento ti kapolisan ti maysa a lalaki ken ti partnerna a babai babaen iti buy bust operation nga impakatda kadagiti suspek idi Disiembre 4.

Segun iti report, nagtsek-in da Juan Paolo Riotoc Paz aka “Jepong”, ken ni Myrelle Tugade Alimay iti Riverside Hotel a masarakan iti Quirino Boulevard, Barangay II, ditoy siudad idi malem ti nadakamat a petsa ket ditoy ti mapapati a nangisayangkatanda iti transaksion mainaig iti droga.

Napilaanen iti kaso a panagsalungasing iti Section 5, 11, 12 ken 15 ti RA 9165 maikontra ken ni Juan Paolo Riotoc Paz aka “Jepong”, ken ni Myrelle Tugade Alimay a naiyendorso iti City Prosecutor’s Office, Vigan City.

Sabali laeng ti kaso a panagsalungasing iti RA 10591 ti naipila maikontra ken ni Riotoc.

Iti nasao nga operasion, nakakumpiska dagiti otoridad iti ikut da Riotoc Paz, 25, baro, ken residente iti Poblacion San Vicente, Ilocos Sur ken Tugade 30, naasawaan, ken residente iti Barangay Bayubay Sur, San Vicente, Ilocos Sur, iti walo a heat sealed transparent plastic sachet a naglaon iti mapapati a shabu ken drug paraphernalia; P1,000.00 a naaramat a buy bust money; Ingram machine pistol firearm; 10 bala para 9 mm ken Nokia cellphone.#