Sabali pay a drug personality, napapatay

SAN VICENTE, Ilocos Sur – Sabali manen a drug personality ti ginudas dagiti armado a lalaki a masuspetsa a miembro ti bihilante a grupo sadiay Barangay Bayubay, ditoy nga ili idi malem ti Agosto 29.

Saanen a naidanon ti biag ni John Maverick Yu y Ridon, 22, naasawaan, ken residente iti nadakamat a barangay iti Metro Vigan Cooperative Hospital, Bantay gapu iti sinagrapna a dunor iti ulona.

Segun iti rekord ti polis ditoy, nakalista ni Yu a nume-ro tres a drug personality, municipal level.

Masuspetsa a nasipsiputanen ni Yu manipud idi simmuko iti kapolisan kas suportana iti all-out war nga iwaywayat ti agdama nga administrasion maikontra iti illegal a droga.

Kas maibatay iti blotter, kagapgapu ni Yu a nagatender iti moral recovery program iti police station ditoy nga ili ket aggawiddan iti maysa a kalugaranna a nagsakay iti motorsiklo idi pinaltogan dagiti di nabigbig a suspek a naglugan met iti motorsiklo.

Naglibas dagiti suspek kalpasan ti pammaltog.

Awanen ti biag ni Yu idi maidanon dagiti nagresponde a polis iti Metro Vigan Cooperative Hospital.

Iti panangproseso ti Provincial Crime Laboratory Office a nakabase iti Ilocos Sur Police Provincial Office nga indauluan ni Chief Inspector Leonardo Arce, babaen ti tulong ti KIMAT ti Metro Vigan ken personnel ti PIDMB, nakarekobreda iti dua a kapsula manipud iti cal. 45 iti nakapasamakan ti krimen.

Agtultuloy ti panagimbestiga ti kapolisan no ania ti motibo ti pannakapapatay ni Yu.#