Sabali pay a suspek agipuslit iti marijuana bricks, natuntonan dagiti polis

ALILEM, Ilocos Sur – Kalpasan ti maysa nga aldaw a manhunt operation, natuntonan dagiti polis ti maysa pay kadagiti suspek a mapapati a mangipuslit iti marihuana sadiay Barangay Poblacion, Alilem, Ilocos Sur idi rabii ti Abril 15.

Inaresto dagiti polis ni Ronald Quitilen y Aguilar, 23, ken residente iti Barangay Farola, Tagudin, Ilocos Sur a natuntonanda nga aglemlemmeng iti maysa kadagiti kuarto iti balay ti maysa a Juanita Binay-an iti Purok Namnama, Barangay Poblacion ditoy nga ili.

Nupay kasta, nakataray ti maysa a mapapati a kaduada iti illegal a droga a nainaganan Bentong.

Sakbayna, inaresto dagiti polis ti mapapati a kadua ni Quitilen a nainaiganan Richard Leal Lanuza, 23, baro, ken residente iti Barangay Farola, Tagudin, Ilocos Sur, ken akinkukua iti Mitsukoshi Model Bonus 110 motorcycle a nabati dagiti suspek idi kinamat ida dagiti polis bayat ti panaglibasda.

Idi agarup 8:15 ti rabii ti nadakamat nga aldaw, pinasardeng dagiti polis ti motorsiklo dagiti dua kas paset ti anti-criminality ken Oplan Bakal/Sita babaen ti impasdekda a checkpoint iti Through Cut Road, Sitio Macdaar, Barangay Poblacion.

Ngem pinakaskas ketdi ni Leal ti motorsiklona ket kinamat ida dagiti polis a naglugan iti Innova patrol car ken bukodda a motorsiklo.

Iti nagsulian ti Oncita ken Carlo Streets, timmapuak ti di nabigbig a back rider ket timmaray a kimmamang iti Bakun River idinto nga intinnagna dagiti dua a bungon nga awitna.

Nagtuloy ni Leal a nagpataray nga umadayo ngem kanal ti naturongna ket sakbay a maikaruskos, dimsaag sa timmaray iti access road nga agturong iti Purok Namnama.

Impan dagiti polis ti motorsiklo ken dagiti dua a bungon nga intinnag ti maysa kadagiti suspek nga idi sinukimatda ket marijuana fruiting tops gayam ti linaonda a mapattapatta nga agdagsen iti dua a kilos.

Nabigbig ni Leal babaen kadagiti dokumento a narekobre dagiti polis iti nabati a motorsiklo.#