Safety measures iti pannakapukan dagiti kayo iti National Highway, pinasingkedan ti District Engineer

BANTAY, Ilocos Sur — Pannakaadaptar dagiti safety measures kabayatan ti pannakapukan dagiti kayo ken pannakaikkat dagiti poste ken dadduma pay a tubeng iti igid ti Manila North Road ken National Highway a sakup ti Ilocos Sur First District Engineering Office ti Department of Public Works and Highways.

Dayta ti napasingkedan kabayatan iti pannakiuman ti Ilocos Sur Integrated Press iti naangay a Kapihan iti Amianan Media Forum kadagiti opisial ti DPWH – FDEO a da Engr. Rey Organo, District Engineer; Engr. Rey Ablog, Asst. District Engineer; Engr. Eddie Rosario, Chief of Road Maintenance; ken Engr. Lauriano Quintos, Chief of Quality Control Division.

Inlawlawag ni Engr. Organo nga addan nagpinnirmaan dagiti pannakabagi ti DPWH FDEO, Department of Environment and Natural Resources ken akinsakup a local government unit iti pannakapukan dagiti kayo tapno madalusan iti agsumbangir nga igid ti kalsada ken nalawlawa ti pagdaliasatan dagiti motorista a panggep ti road-widening project ti gobierno.

Impakaammona nga addan dagiti cutting permit nga imparuar ti DENR ket adun dagiti napukan a kayo iti las-ud ti 20 a metro a kalawa ti National Highway. Impakaammona pay a narugian metten ti pannaka-
yakar dagiti poste ti koriente ken telekomunikasion kadagiti igid
ti kalsada.

Impakaammo met ni Engr. Rosario ti pannakaipaabay dagiti DPWH plastic warning barrier kadagiti nagpukanan a pungdol tapno makita dagiti motorista ket maliklikan ti aksidente nangruna kadagiti agmotmotorsiklo. Inlawlawagna a planoda a puorandanto dagiti pungdol, kalien ken sementuenda a kalebel ti kalsada tapno kapatadna ti kalsada.

Inlawlawagna pay nga amin a napukan ket addaan iti numero ken maisurat iti asideg dagiti nagpukanan para iti imbentario. Inlawlawagna a ti pannakapukan dagiti kayo ket inwayat dagiti akinsakup nga LGU ket addan kadakuada ti pangngeddeng no sadino ti pakaipanan ken ania ti aramidenda kadagiti napukan a kayo.

Impakaammo pay ni Engr. Organo a kalpasanto ti pannakapalawa ti rangtay sadiay karayan iti nagbaetan ti Brgy. Resureccion ken Baliw, San Juan ket maisayangkatton ti road widening a pakadalapusan dagiti adu a balay iti poblasion. Immandana met ti inspeksion kadagiti proyekto nga insayangkat ti DPWH Regional Office nga adda pay laeng ti warrantee period ti kontratista tapno simpaenda dagiti proyekto nga addan depektona.

Inrakurak pay ni Engr. Organo a manamnama ti pannakaleppas inton 2020 ti Bantay–San Ildefonso bypass road ken Bantay–Caoayan bypass road a mangpadaras ti taray ti trapiko kadagiti kalsada iti Metro Vigan. Impakaammona nga agtultuloy met ti pannakaisayangkat ti coastal road mangrugi iti asideg ti airport iti Vigan City ken agpaamianan sadiay Sinait.

Impakaammo met ni Engr. Ablog ti kasasaad ti Vigan City boardwalk a proyekto ti DPWH Regional Office ken City Government a maiwayat ti phase-by-phase a proyekto para ti pannakaaramid iti kalsada iti igid ti Govantes River. Impakaammona a malukatanto met laeng dagiti dua a kalsada iti likudan ti Palacio Arzobispado inton malpas ti board walk iti Amianan ti mabangbangon a pasdek iti asideg ti Provincial Capitol.

Impasingked met ni Engr. Quintos ti panangpatalgedda a dagiti kalidad dagiti proyekto nga ilepleppas dagiti kontratista ket nangato ti kalidadna tapno saan a masayang dagiti maar-aramat a pondo a nagtaud iti buis dagiti tattao.

Iti mainaig a damag maipapan ti pannakapukan dagiti kayo iti igid ti National Highway iti Ilocos Sur, nangiwayat ni Sangguniang Panglalawigan Committee on Environment Chairman SPM Christopher Baterina iti hearing maipapan ti kiddaw a pannakaisardeng pay laeng ti pannakapukan dagiti kayo.

Nagatender iti hearing dagiti pannakabagi ti DPWH, DENR, maseknan nga LGU ken dadduma pay nga stakeholders.

Natratar ti isyu ti panagpukan ken accounting dagiti kayo, ken kapateg dagiti mapukan a kayo iti pannakasaluad ti aglawlaw ken nakaparsuaan. Napagnunumuan ti pannakaipaay ti moratorium wenno pannakaisardeng pay laeng ti panagpukan ken mayun-una pay a maikkat dagiti amin a poste, waiting shed, marker ken dadduma pay a makatubeng iti igid ti National Highway. ●