Sakbay nga Agtabon ti Initko

Ababa a Nobela ni Jobert M. Pacnis
(Maika-12 a paset)

“Okey,” kinunak, “yuraynak ta agorderak iti pagsanguanta.”

Saan a simmungbat ngem di met a nagkedked.

Nagorderak iti dua a batil-patong ken maysa litro a Coke. Nagsubliak a dagus iti yan ti babai. Naalikuteg dagiti matana. Kasla madandanagan.

Inyam-ammona ti bagina. Isu kan’ni Isabel Gielado. Beinte kuatrona. Ulila a demmang, awanan asawa ken agnaed iti Capan-aw a kaarruba ti ilimi a Cabaybay.

“Agsaritata iti sabali a disso, sir,” kinunana idi maib-ibusmin ti inorderko. “Adu pay ti kayatko a maammuam.”

Pinerrengko.

“Kas nakunakon, sir, saanka nga agdanag. Dika a loklokuen. Kayatko laeng ti makatulong.”

Rimmuarkami iti pasdek. Nagkalubbonkami iti motorsiklok. Indiretsok iti maysa a resort. Ditoy, intuloyna ti nagestoria.

Disisaisna kano idi maisar-ong iti Cabaybay ta inkeddengna ti agnaed iti ‘yan da apongna a baket ken lakay. Kalleppas idi ti 40 days dagiti nagannak kenkuana a natay iti aksidente iti lugan. Iti dina ninamnama, iti maysa a tengnga’t rabii, inuli ida dagiti adik. Pinatayda dagiti lakay ken baket idinto a nagum-umaanda a rinabngis ti dayawna. Pagyamananna laengen ta dida a pinatay. Pinanawanda lattan a kasta unay ti anug-ogna iti baet ti panagkakapsutna.

Napasamak ti imbestigasion ngem awan ti nagturturonganna. Dina met ngarud nairupaan dagiti suspect ta nakaabungot dagitoy. Sa maysa, damona laeng ti bumisita iti bario da apongna. Kasano koma nga ammona ti tigtignay dagiti lumugar?

Saan ngarud a nasolbar ti krimen. Nagbalin a nakakaskas-ang ti biagna. Napuotanna laengen a maysan a pusher tapno laeng agbiag.

Kadayta a panagpusher-na, naam-ammona dagiti nanggundaway kenkuana.

Maysa idi a sardam, un-unorenna ti lipit nga agturong iti maysa a klientena idi makasabat iti grupo dagiti lallaki. Umarimbangawda. Naglinged iti kasabaan iti igid ti dalan ta amangan no an-anuenda pay aglalo ket kasla nabartek dagitoy.

“Adda ngata met la kargada ni Onning?” nangngegna a sinaludsod ti maysa.
Onning? Ti klientena ti lawlawatenda.

“’Su met ti nakunana itay ‘diay ili,” naisungbat.

Nasayaat ngarud. Sigurado man ngaruden ti itatayok ti rikna!”

Ket kasta unay a paggaakda.

“Makaramantay’ koma manen iti kas kadaydi linunestayo dita Calumotan!” adda nagkuna. “Ha-ha-ha!”

“Sayang ni Onning ta dina naramanan, hahaha!”

Calumotan? Ti bario da apongna! Awanen ti ammona pay a nagundawayan dita no di isuna laeng. No kasta, dagitoy a lallaki ti nangdadael iti masakbayanna!
Nagsibo ti darana. Nakarawana ti sangkaitugotna nga armasna nga inted kenkuana ti sindikato. Napno iti bala.

Kadaydi met laeng a kanito, nausarna ti igam. Uppat a kanalbuong ti nangpisang iti naulimek a sardam. Naragsakan ta nakaibalesen!

Impudnona iti sindikato ti napasamak. Ditoy, naam-ammona ti paggapgapuan dagiti ilaklakona a droga. Gapu siguro ta makakayaw ti pintasna, binabai ti drug lord a dina impagarup a maysa gayam a politiko.

Iti pannakayasidegna iti drug lord, nabukel ti maysa a panggep iti isipna. Masapul a magupeden ti panagraira ti maiparit nga agas. Adu la unay ti daddadaelen daytoy a biag.

Ta saan man met a dakes a tao. Biktima laeng ti nasutil a gasat.

Inkagumaanna a makita ti linaon ti maaw-awagan iti blue book. Pagsayaatanna ta isu payen a mismo ti nangitalkan ti drug lord. Ta kaslan asawa daytoy. Ammonan a naalana ti panagtalek drug lord. Isu nga idi maikkan iti gundaway, intaraynan ti libro.

Manipud idin, biniroken ti sindikato. Ngem naplanona kanon ti amin. Isukona daytoy kenkuana a maysa a taga-media.

“Apay a di dagiti pannakabagi ti linteg?”

“Tapno agbanag laeng iti awan ti nagrigrigatak, sir? Nakakaskas-ang a panunoten ngem adu kadakuada ti nakalista ‘toy blue book.” Inyaonna iti bagna ti kasla kadakkel ti notebook libro. Inyawatna kaniak.

Naatap dagiti matana apaman a naawatko ti libro. Inukradko ket pinalabsak a binasa. Nagdadakkelen a tao ti adda ditoy! Pordios!

“Sir, pangngaasim, tulongannak koma. Agpeggaden ti biagko. Nupay kasta, nakasaganaak met ketdin. Ti napateg, agpullonto koma dagita adda dita a libro,” agarimayangen dagiti luana.

“Mangnamnamaka, Isabel,” kinunak.

“Sige, sir, ta mapanak pay,” ket timmallikuden.

Ngem inggawidko. “Papanam ngarud ita?”

“Makaammod’tan, sir. Ti napateg, naitedko kenkan ti ebidensia.”

“Saan. Kargoka itan. Masapul a protektaranka.”

“Sir…”

“No kayatmo, ilemmengka pay laeng…”

Immannugot.

“Mapanko pay ngarud alaen dagiti gamitko idiay kaserak, sir. Tawagankanto.”

Apagdanonko iti balay kadayta a malem idi mangngegak ti maysa a flash report iti radio a pagpapaayak. Maysa a bangkay ti babai ti nakitada iti maysa nga apartment. Anian a kullayawko idi maibaga ti kinaasinona. Ni Isabel!

Nasurotanen ti sindikato!

Nagdanagak. Sigurado a birbirokenda itan ti libro. Agpeggadak la ketdi met no naibaga ni Isabel nga adda kaniak ti blue book. Dakesen!

Linuktak ti laptop ken scanner-ko. Kinopiak ti libro. Pinutedputedko nga impatulod daytoy iti gayyemko babaen ti e-mail.

KABIGATANNA, nakaawatak iti tawag. Baro a numero.

“Hello! ‘Sino atoy?” kinunak.

“Rilo, mabalin kadi nga isublim ita met laeng ti libro?” nabangag ngem napnuan turay a timek iti bangir a linia.

“Am-ammonak? Ken ania a libro ti ibagbagam?”
Pimgaak. “Saannakon nga allilawen. Ammok nga inted kenka ni Isabel ti libro. Isublim kadi wenno saan?”

“Ket no saan?” intukodko.

Ad-addan ti paggaakna. “Adda kenka no kayatmon ti tumangad iti barsanga!”

Urayak la nadayyeg. “Didak mabutbuteng!” kinunak. “Agpakitaka no talaga a naturedka. Saan ket a dayta mammutbuteng ti obram! Ammok, sika ti drug lord!”

“Ha-ha-ha! Naturedka a talaga!”

“No itedko ti sasawem a libro, ammok, didakto met laeng a biagen!”

“Muy bien! Nasiribka. Ala, agpaaramidka ngaruden iti lungonmo!”

Ket pinutednan ti linia.

(Maituloyto)