Sakbay nga Agtabon ti Initko

Ababa a Nobela ni Jobert M. Pacnis
(Maika-13 a paset)

SABADO. Daldalusak dagiti mulak a kayo a tubuanen ti ruot idi sukonennak ni nanang. Adda kano barito nga agsapsapul kaniak. Makalawasen ti limbes sipud daydi naawatko a tawag. Diak imbagbaga daytoy iti balay tapno di pay isu a pagdandanaganda.

Insardengko ti ar-aramidek. Simmurotak ken ni nanang iti panagturongna iti balay. Nadanonak ti kunana a barito a kasarsarita ni tatang iti kubokubo. Agtayag ngata iti lima kadapan ken uppat a pulgada, kalalainganna iti kapudaw ken nabukel ti rupana. Adda panagkakaingasda ken ni Bentong iti telebision isuna laeng ta long hair. Nakaleslessab pay dagiti matana. Ken nagaatiddog dagiti kukona. Medio panguttongen.

“Apay, barok?” sinaludsodko kenkuana kalpasan a nakapagdaydayaw. Napan metten ni tatang iti balay.

“K-kua, s-sir…” agtigtigerger a timekna.

“Ania gayam ti naganmo?”

“S-siak ni Ben, sir,” insungbatna. “Anaknak ti dati a kaadalanyo… ni Jojo…”

“Ay, sika gayam ‘di nasaona a baritona. Apay kadi, barok?”

“Gapu iti dua a banag, sir.”

Nangyeg ni nanang iti meriendami a liningta a kamotit ken juice.

“Agmeriendaka pay,” kinunak.

“Sige laeng, sir.”

“Ituloymo ngaruden…”

“Umuna, sir, am-ammok unay ni Manang Isabel. Isu ti pangal-alaak kadagiti ilaklakok a maiparit nga agas. Kasta metten dagiti us-usarek.”

No kasta, pudno ti kuna ni gayyem a Jojo. Inagawen ti maiparit nga agas ti anakda! Saan laeng gayamen nga user… pusher payen!

“Ammok no asino ti nangpatay kenkuana, sir.”

“A-asino?” sinaludsodko nupay ammok lattan a ti sindikato.

Imbagana.

Kunakto pay! “Ngem kasano a masiguradom?”

“Nakapagteks sakbay a nadesgrasia, sir. Nagteksak kadaydi aldaw a pannakapaltogna ta mapanko koma alaen ti agas. Ngem kunana a dinakon maikkan ta nagsardengen nga aglako. A madaman a makilinlinnemmengan iti sindikato ta agpeggaden ti biagna. A ti kinapudnona kano ket madama a sisiimen dagitoy iti ruar ti kaserana. Kunana pay, sir, nga ania man ti mapasamak kenkuana kadayta a gundaway, impakaasina a sarakenkayo. Nga ibagak kadakayo ti amin…”

Napaangesak iti nauneg. “Am-ammom kadi dagiti kameng ti sindikato?” sinaludsodko.

“Iti agdua tawen metten a panagar-aramatko iti droga, sir, adun kadagiti asoasoda ti naam-ammok. Kinaagpaysuanna, al-alaendak no kua a kaddua no mapanda sabten ti suplay dita aplaya. Kasukat dayta ti sangkabassit nga usarek.”

“Dita baybay?”

“Wen, sir. Front laeng dagiti panagbungbong no dadduma. Ngem kinapudnona, droga ti imet dagiti nakalugan nga isu met ti mapan sabten dagiti asoasoda.”

Kasta gayam.

“Am-ammom ti drug lord?”

“Maysa kan’ a politiko ditoy ilitayo, sir. Ngem diak ammo no asino. Nangnangngegko laeng dayta a patangan dagiti asoaso no kasta nga ikuyogdak.”

“Kunam itay a dua ti rason no apay nga addaka…”

“Kayatkon ti agbalbaliw, sir. Pangngaasim ta tulongannak koma.”

“Nasayaat, barok, ta nautobmon ti nagbiddutam…”
“Wen, sir. Awan nga agpayso ti pagimbagan nga ipaay ti panagusar iti maiparit nga agas. Madadael laeng ti masakbayan. Ket sakbay a maladaw ti amin, kayatkon nga adayoan dayta a bisio. Kayatkon a tungpalen dagiti nagannak kaniak… a ragpaten dagiti arapaapda.” Ket nagarimayang dagiti luana.

Naasianak iti langana. Inabayko ket impatayko ti imak iti abagana. “Dika agdanag,” impasingkedko. “Tulonganka.” Diak kayaten a mapasamak kenkuana ti nakapay-an ni Isabel.

PINENNEKKO dagiti agdengdengngeg iti programak kadayta nga aldaw ti Lunes. Imbagak nga ania man a banag, aglalo dagiti maikaniwas, adda panagpatinggana. A dagiti parikut ket adda solusionda.

Medio indetaliek pay bassit no kasano a sumsumrek ti maiparit nga agas iti maysa nga ili. No ania ti akem dagiti bilog wenno barangay iti panagsaknap daytoy a bisio.
Ammok lattan nga umas-asuk dagiti lapayag dagiti natamaan. Ngem nakasaganaakon iti mabalin a mapasamak. Ania man dayta, masapul a matungpal ti karik iti bagik. Sakbay nga agtabon ti init iti biagko, makaaramidak man laeng iti uray sangkabassit a pagsayaatan ti ilik.

Aglalabbet a rikna ti immagibas kaniak kalpasan ti programak. Naragsakak ta naisawangko met laeng ti im-impen ti riknak. Naragsakak met ta uray kaskasano, adu latta dagiti agtaltalek kaniak. Ngem madanaganak ta ammok nga umil-ilet ti aangsak, ti lubong a paggargarawak. Ken malidayanak baka no agbanag iti awan daytoy a narugiak. Ngem sabagay, adda ditan. Rumbeng nga ituloyko ti laban.

Ammok met ketdi a dinak baybay-an ti Dios. Isuna ti kangrunaan a kamangko itoy a labanko. Isuna ti pangipasagak iti aminko.

(Adda tuloyna)