Sakbay nga Agtabon ti Initko

Ababa a Nobela ni Jobert M. Pacnis
(Maika-17 a paset)

“Kasano a natuntonandak?”

“Idi naawatko ti e-mail-mo, dagus a nangbilinak iti dua a taok a mangaywan kenka ta ammok ngamin nga agpeggaden ti biagmo. Diak imbagbaga kenka daytoy ta ammok ti prinsipiom, gayyem,” inisemannak ni Sherwin. “Ket nakitada no kasano a naaladaka ti sindikato. Dida nagsayang iti oras. Kinontakdakami a dagus. Sinurotda dagiti nangala kenka kalpasanna. Isu met a naawatko ti text-mo, gayyem!”

“Manen, agyamanak, gayyem…” Ket napaluaak lattan.

“Ala, agpapigsaka ketdi. Natibker dagiti ebidensia ket sigurado nga agpullo amin nga adda pakainaiganna ditoy.”

“Sapay la koma ta kasta, gayyem.”

“Wen, dika agdanag. Dinto pulos a makalisi dagiti maseknan.”

Adda sumungad a lugan. Nakarangrangrang dagiti silawda.

“Dagiti taok dagitan,” kinuna ni Sherwin.

Sinabatmi ida.

“Kabaelam?” intukod ni Sherwin idi makitana ti nabedbedan a sugatko.

“’Nia ket ni gayyemen,” kinunak. “Adayo iti bituka ‘toy tamak.” Ngem kinaagpaysuanna, itay pay a kagkagatek ti bibigko gapu iti ut-ot. Kayatko laeng ngamin a makita dagiti dimteng.

Patrol car, kotse ken dyip dagiti nagparada iti asideg. Naragsakanak a nakakita ken ni Noel a rimmuar iti kotse a binayabay dagiti tao ni Sherwin. Ti laeng drayber ti linaon ti patrol car. Dagiti met kalugarak ken informerko dagiti nagdyip.

“Good work, men!” indayaw ni Sherwin kadagiti taona.

“Sir,” kinuna ti maysa kadakuada, “isuda dagiti timmulong kadakami.” Insungona dagiti kalugarak.

Binangenan kano dagitoy ti kotse ni Noel. Impakaammo kano dagiti informer-ko ti naawatda a message kadagiti kalugarak ket binukelda a dagus ti grupo. Sinapsapuldak. Isu met a masabatda iti maysa a paggasolinaan ti kotse ni Noel a kamkamaten dagiti pannakabagi ti linteg. Ket binangenandan daytoy.

Nagyaman ni Sherwin kadagiti kalugarak.

Inkarigatak nga inasitgan ni Noel a nakaposas dagiti imana. Rumrumsik dagiti matana a naiturong kaniak. Di latta napukaw ti dang-as ti panagkitkitana.

“Agbayadka kaniak iti nangina, Rilo!” imbikagna.

“Noel,” kinunak, “saan a siak ti rumbeng nga agbayad. Sika!” intudok. “Adu ti basolmo iti Cabaybay. Masapul a bayadam dagitoy, sika nga igges ti gimong!”

“Dika agsigsigurado ta apaman a malusotak daytoy, singirenka iti nangina!”

“”No makaruarka pay, a, iti pagbaludan!” Kayatko la koma a disnogen ngem naut-ot unayen ti sugatko. Mariknak payen nga agkapsutak.

“Wen! Adu dagiti mangtulong kaniak!”

“Ti kunam. Agkikitakayto ketdin, a, iti pagbaludan ta agpapadakayo a malungsot sadiay! Mabilbilang metten ti oras dagiti kakaduam a nangangato nga opisial iti gobierno.”

Kinusilapannak ngem tinallikudakon.

“Men, let’s go!” binilin ni Sherwin dagiti taona. Nagdardarasda a naglugan. “Mapankamin, gayyem,” impakadana.

“Agyamanak manen, gayyem.”

Tinurongko dagiti kalugarak. Nakaragragsakda a nangsabat kaniak. Pimmigsa bassit ti riknak. Ngem idi makitada ti nabedbedan a sugatko, dagus nga inlugandak iti dyip. Intaraydak iti kaasitgan nga ospital. Iti daya, agbannawagen.
SINAPAK ti nagriing kadayta nga agsapa ti Domingo. Nag-rubber shoes-ak apaman a nakapagmulomogak. Innak ag-jogging ‘diay baybay. Kayatko ti lumang-ab iti sadiwa nga angin. Kadagiti naglabas, immanayen kaniak ti stationary jogging iti para-angan. Agtallo lawas met a tinartarakenko ti sugatko.

Sumingsingising ti init idi makagtengak iti aplaya. Anian a naindaniwan a buya! Pannakalipatko la ketdin iti selponko wenno iti digicam-ko ta retratuek koma. Ngem di bale, addanto pay sabali a gundaway.

Inarakupnak ti nalamiis a pul-oy nga insang-aw ti baybay. Nabang-aranak. Rinugiak ti nag-jogging. Iti leleggakan ti turongek.

Narusepakon iti ling-et idi makagtengak iti pondo dagiti bilog. Manarimaan ti maysa a barangay a maidurduron iti sang-at.

“Adu, kakabsat?” inamadko idi makaasidegak.

“Adda met siguro sukat ti gasolina, sir…” kinunada.

Nakipagsang-atak. Nagdadakkelan a siriw dagiti naala.

Gimmatangak iti dua kilo. Naimbagto la a prituen dagiti dadduma nga isagpaw iti dinengdeng wenno pinakbet.

“Agyamankami, sir,” kinu-na ni Tata Inso, maysa kadagiti lider dagiti mangngalap ditoy Cabuyonan, “ta gapu kadakayo, naisardengen ti panagbungbong. Ita, madlawmin nga agsubsubli iti dati ti makalapanmi.”

“Awan aniamanna, tata,” kinunak. “Inaramidko laeng ti pagrebbengak.”

(Maigibusto)