Sakbay nga Agtabon ti Initko

Ababa a Nobela ni Jobert M. Pacnis
(Maudi a paset)

“Natalna payen ti aglawlaw,” kinuna ti maysa kadagiti agangkat a ni Manang Karing. “Awanen dagiti kabutbuteng nga adik. Nagrigat idi ti marabrabiyan iti papananna.”

“Sapay koma ta dinton makastrek ti droga ditoy ilitayo,” kinunak met. “Masapul nga agbantaytayo. Ditayon ipalubos a mastrek manen ti maiparit nga agas ti ilitayo.”

“Ita ta awanen dagiti dadaulo iti kinadakes, namnamaenmi a kasta, sir,” insalpika met ni Manong Boy a bugador ti daklis. “Sapay la koma ta naikkan iti pagpampanunotan dagiti sumarsaruno a lider.”

“Pagyamanantay’ pay ta saanen a matuloy ‘di pagam-amkantayo a pannakaminas ti igid ti baybay,” innayon pay ni Angkel Omar a maysa kadagiti adda sigayna. “Ditayon pakadanagan ti pannakarebba dagiti pantok a saripdatayo iti aluyo. Manayon latta ngarud ti pannakaramantayo iti gakka, tarukoy ken kusimay. Ken barawbaraw no panawenna.”

“Ania la ketdin, ’ya, ti tao,” insennaay ni Ama Narding, “ta di mapmapnek iti inted kenkuana ti Dios. Pagbibiaganna, kayatna pay a bukiboken. Ngem, ala, napaneknekantayo manen a di matmaturog ti Apo. Masapul nga agyamantayo Kenkuana ta dinatayo a binaybay-an. Ta dina impalubos a maisagmak ti kabsattayo a ni Rilo.”

“Nagpaayam idi a sekta, ama?” inyangaw kenkuana ni Kasinsin Badol nga adda gayamen iti asideg. Kaugalianna ti makipagsang-at iti sigay ta naimbag la nga ipasidana kadagiti innem a putotna. Nupay matukadtukad dagitoy, saanda kan’ pay met a nanglangan a nangan. Nagaget ngamin ni kasinsin.

Pimgaakkami. “Ti la sasawem, kasinsin,” kinunak.

“Puera angaw,” inserioso met laeng ni Kasinsin Badol. “Dakkel a talaga ti yamanentayo ken ni kasinsin ta insebbana ti biagna gapu iti ayatna kadatayo. Dayta ti pakalaglagipanto ti sibubukel nga ili kenkuana.”

“Dika man, kasinsin,” inamparak.

“Agpayso met ngamin, sir,” kinuna ni Tata Inso. “Ket matdakami nga agyamyaman kenka.”

“Ditayto koma ngarud liplipatan ni kasinsin ‘ton 2013, kakaddua,” intuloy ni Kasinsin Badol. Kinermannak.

“’Suska met, kasinsin,” urayak la napadiwig. “Dimo ibagbaga ti kasta ta baka patiendaka. Ammom met nga awan ti planok a sumrek iti politika.”

“Awan dakesna, barok,” kinuna ni Ama Narding. “Agtarayka man ketdi nga agpayso tapno adda met turongen ti ilitayo.”

“Pagyamanak ti ipakpakitayo a suporta, kakabsat,” kinunak. “Ngem pasensiakayo laengen ta pulos nga awan panggepko a sumrek iti politika. Ituloyko lattan ti agserbi babaen ti panagtultuloyko nga agprograma iti radio. Saan met siguron nga agaramid iti madi dagiti simmukat kadagiti nagpullo nga agtuturaytao.”

Nagsisipatda. “Maawatandaka, barok.”

NAGSUKATAK apaman a nakabuyatak. Madaman a daldalusan ni nanang ti insangpetko nga ikan idi agpakadaak.

“Papanam, ‘ya?” inamadna.

“’Diay simbaan, ‘nang,” kinunak. Ita laeng a makasuknalak manipud iti daydi pannakapaltog ken iruruarko iti ospital.

“Kasta kadi? Ala, nasayaat met. Dakkel manen nga utangmo Kenkuana daytoy baro a biagmo.”

“Wen, ‘nang.”

Adun dagiti nadanonak iti simbaan. Madama pay ketdin ni Father Vea nga agsermon. Pinilik ti nagpuesto iti akinlikud amin iti kanigid a tugaw.

Nabagas ti sermon ni Apo Padi. Naitalimudok daytoy iti templo ti Dios. Wen, ti bagitayo kano ti templo ti Apo. Rumbeng ngarud nga aywanantayo daytoy. No daddadaelen kan’ laeng kadagiti bisio wenno ania man a maikaniwas nga aramid, awan papananna no di makapungtot ti Dios. Ta ipakpakitatay’ laeng nga awan panangipategtayo iti sagutna. Maaramat ketdi koma kano daytoy a templo a pangtulong iti pada a tao. Iti panangidaydayaw iti Apo. Iti pannakaisaknap ti ayatna ditoy lubong.

Komunion. Diak nagpaudi a nangawat iti bagi ken dara ni Kristo. Nagparintumengak idi makasubliak iti tugawko.

Nagdaydayawak iti Dios. Nagyamanak kadagiti grasia ken pannarabay nga ipapaayna iti inaldaw-aldaw a panagbiagko. Nagyamanak iti panangispalna kaniak iti di mapagduaduaan a peggad. Kasta metten iti pannakaipatungpalko manen ti maysa pay nga akemko itoy a biag: ti panagserbik met iti ili a nakayanakak sakbay man laeng nga agtabon ti initko. Nagkiddawak met iti pammakawan kadagiti adu a nagkurangak iti padak a tao. Ket sapay la koma ta tarabayennak latta kadagiti sabali pay a pannakigubalko itoy a biag.

Apo, maysa man pay, ‘ya, kinunak idi malagipko. Sakbay kadi, a, nga agtabon ti initko ket makasapulakon iti pangipaayak iti panawenko, iti masapulak, iti biagko. In short, Lord, itundadak koma metten iti babai a mamagpitik iti pusok.

Nakaisemak idi malpasak. Kaslaak metten ubing a himmerit iti Apo. Ngem di kad’ kunada a no agkararagka, ket kapatangmo a kasla adda laeng iti sangom ti Dios? Ibagam ti kayatmo, ti adda iti kananakemmo— ‘tay awanan panaginkukuna.

Iti iruruarko iti simbaan, nagugisak ket manen, nagyamanak iti Dios.

No kaano a patganna ti kiddawko, Isu laeng ti makaammo. Ket siuurayak kadayta.

Limmaksidak iti ruangan. Nakalaglag-an man ti riknak.

(Gibusna)